వైఎస్ఆర్‌ నగర్‌ వాసులకు న్యాయం చేయాలి
గుడిసెవాసులకు పట్టాలివ్వాలి.. బాధ్యులపై కేసులు నమోదు చేయాలి
లేదంటే డిప్యూటీ సీఎం భట్టి పర్యటన అడ్డుకుంటాం!
కాజీపేట భూముల వ్యవహారంపై నాయిని సమాధానం చెప్పాలి
ప్రభుత్వ మాజీ చీఫ్‌విప్‌, మాజీ ఎమ్మెల్యే దాస్యం వినయ్‌ భాస్కర్‌ డిమాండ్‌
కాకతీయ, హ‌న్మ‌కొండ : వైఎస్ఆర్‌ నగర్‌ గుడిసెవాసులకు న్యాయం చేయకుండా ఉప ముఖ్యమంత్రి భట్టి విక్రమార్క పర్యటన ముగిస్తే అడ్డుకుంటామని ప్రభుత్వ మాజీ చీఫ్‌విప్‌, మాజీ ఎమ్మెల్యే దాస్యం వినయ్‌ భాస్కర్‌ హెచ్చరించారు. గుడిసెవాసులకు పట్టాలు ఇవ్వాలని లేదా ఆ భూమి పేదలకు దక్కేలా చర్యలు తీసుకోవాలని డిమాండ్‌ చేశారు. మంగళవారం కాజీపేట ప్రెస్‌క్లబ్‌లో బీఆర్ఎస్‌ స్థానిక నాయకులతో కలిసి నిర్వహించిన విలేకరుల సమావేశంలో ఆయన మాట్లాడారు. కాజీపేటలో 30 ఏళ్ల క్రితం కాంగ్రెస్‌ నాయకులే సీలింగ్‌, ప్రభుత్వ భూములంటూ పేదలతో గుడిసెలు వేయించారని వినయ్‌ భాస్కర్‌ పేర్కొన్నారు. 1989–94 మధ్య ప్రజాసంఘాలు ఆ స్థలాన్ని కాపాడాయని, అక్కడ బస్టాండ్‌ నిర్మిస్తామని అప్పటి పాలకులు, అధికారులు ప్రకటించారని గుర్తుచేశారు. బీఆర్ఎస్‌ హయాంలో గుడిసెవాసులకు ఇబ్బందులు కలగకుండా చూశామని, పట్టాలిస్తామని చెప్పిన ఎమ్మెల్యే నాయిని రాజేందర్‌రెడ్డి ఇప్పుడు మాట మార్చారని విమర్శించారు. ఈ భూమి వ్యవహారంలో కోట్లాది రూపాయలు చేతులు మారాయన్న ఆయన, తహసీల్దార్‌కు వినతిపత్రం ఇచ్చి వారం గడిచినా స్పందన లేదన్నారు. ఈ అంశంపై నాయిని సమాధానం చెప్పాలని డిమాండ్‌ చేశారు. కాజీపేట ప్రజల రవాణా సౌకర్యం కోసం రూ.76 కోట్లతో చేపట్టిన బ్రిడ్జి నిర్మాణంలో 80 శాతం పనులు పూర్తి చేశామని తెలిపారు. 100 రోజుల్లో పనులు పూర్తిచేస్తానన్న నాయిని, మూడేళ్లు కావస్తున్నా ఎందుకు పూర్తి చేయలేదని ప్రశ్నించారు. రైల్వే స్టేడియంలో బస్టాండ్‌ నిర్మిస్తామని, 100 రోజుల్లో పనులు చేపడతామని ఇచ్చిన హామీ ఏమైందని నిలదీశారు. కోచ్‌ ఫ్యాక్టరీ, రైల్వే డివిజన్‌ సాధన కోసం తాము పోరాడినప్పుడు నాయిని ఎక్కడున్నారని ప్రశ్నిస్తూ, తనపై విమర్శలు చేసే ముందు నోరు అదుపులో పెట్టుకోవాలని వ్యాఖ్యానించారు.
మూడు డిమాండ్లు నెరవేర్చాలి
వైఎస్ఆర్‌ నగర్‌ గుడిసెవాసుల తరఫున పోరాడుతున్న బీఆర్ఎస్‌ నాయకులపై పెట్టిన కేసులు ఎత్తివేయాలని, గుడిసెవాసులపై దాడి చేసిన వారిపై కేసులు నమోదు చేయాలని వినయ్‌ భాస్కర్‌ డిమాండ్‌ చేశారు. బాధితులకు పట్టాలు ఇవ్వాలని లేదా భూమి పేదలకు దక్కేలా చర్యలు తీసుకోవాలని కోరారు. భట్టి విక్రమార్క పర్యటన పూర్తయ్యేలోపు న్యాయం చేయాలని, లేదంటే స్పష్టమైన ప్రకటన చేయాలని అన్నారు. స్పందన రాకపోతే పర్యటనను అడ్డుకుంటామని హెచ్చరించారు. సమావేశంలో బీఆర్ఎస్‌ రాష్ట్ర కార్యదర్శి నార్లగిరి రమేష్‌, సుంచు కృష్ణ, మాజీ కార్పొరేటర్‌ సంకు నర్సింగరావు, గబ్బేట శ్రీనివాస్‌, డివిజన్‌ అధ్యక్షులు పాలడుగుల శివకుమార్‌, బేధరకోట రంజిత్‌, కుమ్మరి కోటిలింగం, కాటపురం రాజు, బస్వా యాదగిరి, ఎం.డి. ఆఫ్జాల్‌, ఎస్‌.కె. మహుముద్‌, ఎం.డి. హుస్సేన్‌, మర్యాల కృష్ణ, బండి చందర్‌, బరిగెల వినయ్‌, పడిదెల శేఖర్‌, మాతంగి మెహన్‌, మంద శ్రీనివాస్‌, జన్ను శంకర్‌ తదితరులు పాల్గొన్నారు.
