గిరిజన విద్యార్థినుల్లో ప్రతిభా వికాసం
ఐదు క్లబ్‌ల ఆధ్వర్యంలో వినూత్న పోటీలు
వివిధ అంశాల్లో సత్తాచాటిన ఆశ్రమ పాఠశాలల బాలికలు
కాకతీయ, ఏటూరునాగారం : గిరిజన విద్యార్థుల్లో దాగి ఉన్న ప్రతిభను వెలికితీయడంతో పాటు వారిని విద్యా, సాంస్కృతిక, క్రీడా, సాంకేతిక రంగాల్లో నైపుణ్యవంతులుగా తీర్చిదిద్దే లక్ష్యంతో ఐటీడీఏ ఏటూరునాగారం వినూత్న కార్యక్రమానికి శ్రీకారం చుట్టింది. ప్రాజెక్టు అధికారి లెనిన్ వత్సల్ టొప్పో ఆదేశాల మేరకు ఏటీడీఓ పరిధిలోని ప్రభుత్వ గిరిజన ఆశ్రమ పాఠశాలలు, వసతిగృహాల విద్యార్థులకు మంగళవారం ఏకే ఘన్‌పూర్ బాలికల ఆశ్రమ పాఠశాలలో ఐదు క్లబ్‌ల ఆధ్వర్యంలో పోటీలు నిర్వహించారు. లిటరేచర్‌, ఆర్ట్‌ అండ్ కల్చర్‌, స్పోర్ట్స్‌ అండ్ ఫిట్‌నెస్‌, ఎకో, సైన్స్‌ అండ్ టెక్నాలజీ క్లబ్‌లుగా విభజించి విద్యార్థుల ప్రతిభకు పరీక్ష పెట్టారు. అక్షరాస్యత ప్రాముఖ్యత, నాయకత్వ లక్షణాలు, సాంస్కృతిక వారసత్వ పరిరక్షణ, ఆధునిక క్రీడలు, ఫిట్‌నెస్‌లో సాంకేతికత పాత్ర, ఎల్‌నినో ప్రభావంతో పర్యావరణ, వ్యవసాయ రంగాలు ఎదుర్కొంటున్న సవాళ్లు, కృత్రిమ మేధస్సు వంటి అంశాలపై పోటీలు నిర్వహించడంతో విద్యార్థులు ఉత్సాహంగా పాల్గొని తమ నైపుణ్యాలను ప్రదర్శించారు. ఈ పోటీల్లో లిటరేచర్‌ క్లబ్‌ విభాగంలో ఏకే ఘ‌ణ‌పూర్ ఆశ్రమ పాఠశాలకు చెందిన జి.ప్రియాంక, ఆర్ట్‌ అండ్ కల్చర్‌ క్లబ్‌లో ఊరట్టం ఆశ్రమ పాఠశాలకు చెందిన ఎల్‌.నిహారిక, స్పోర్ట్స్‌ అండ్ ఫిట్‌నెస్‌ క్లబ్‌లో తాడ్వాయి ఆశ్రమ పాఠశాలకు చెందిన యు.మైతిలి, ఎకో క్లబ్‌లో తాడ్వాయి పాఠశాలకు చెందిన డి.నందిని, సైన్స్‌ అండ్ టెక్నాలజీ క్లబ్‌లో తాడ్వాయి పాఠశాలకు చెందిన కె.జశ్విక విజేతలుగా నిలిచారు. పోటీల నిర్వహణను ఏటీడీఓ, డిప్యూటీ ఈఓ, ఏసీఎంఓ, జీసీడీఓ, ప్రత్యేక అధికారులు పరిశీలించారు. కేవలం పాఠ్యపుస్తకాలకే విద్యను పరిమితం చేయకుండా విద్యార్థుల్లో నాయకత్వం, సృజనాత్మకత, సామాజిక స్పృహ, శాస్త్రీయ దృక్పథాన్ని పెంపొందించేందుకు ఇలాంటి పోటీలు దోహదపడనున్నాయి.
