ఔట్‌సోర్సింగ్‌ ఉద్యోగులకు న్యాయం చేస్తాం!
వేతన కోతలు, హోదాల మార్పులపై ఉప ముఖ్యమంత్రికి వినతి
తెలంగాణ మున్సిపల్‌ ఔట్‌సోర్సింగ్‌ కంప్యూటర్‌ ఆపరేటర్స్‌ అసోసియేషన్‌ రాష్ట్ర అధ్యక్షుడు మియాపురం శ్రీకాంత్‌
కాకతీయ, హైదరాబాద్ : మున్సిపల్‌ ఔట్‌సోర్సింగ్‌ ఉద్యోగుల సమస్యలను ముఖ్యమంత్రి రేవంత్‌రెడ్డి దృష్టికి తీసుకెళ్లి పరిష్కారానికి కృషి చేస్తానని ఉప ముఖ్యమంత్రి, ఆర్థిక శాఖ మంత్రి మల్లు భట్టి విక్రమార్క హామీ ఇచ్చారని తెలంగాణ మున్సిపల్‌ ఔట్‌సోర్సింగ్‌ కంప్యూటర్‌ ఆపరేటర్స్‌ అసోసియేషన్‌ రాష్ట్ర అధ్యక్షుడు మియాపురం శ్రీకాంత్‌ తెలిపారు. ఉద్యోగుల సమస్యలపై ఉప ముఖ్యమంత్రిని కలిసి వినతిపత్రం అందించినట్లు పేర్కొన్నారు. ముఖ్యంగా జీఓ ఆర్‌టీ నంబర్‌ 1181 ద్వారా వేతనాల్లో జరుగుతున్న కోతలు, హోదాల మార్పులు, ఉద్యోగులపై పడుతున్న ఆర్థిక భారాన్ని వివరించినట్లు వెల్లడించారు. దశాబ్దాలుగా మున్సిపాలిటీల్లో ప్రజలకు సేవలందిస్తున్న ఔట్‌సోర్సింగ్‌ ఉద్యోగులు వేతన కోతలతో ఎదుర్కొంటున్న ఇబ్బందులను ఆయన దృష్టికి తీసుకెళ్లామన్నారు. ఉద్యోగుల సమస్యలను ఉప ముఖ్యమంత్రి ఓపికగా విని సానుకూలంగా స్పందించారని శ్రీకాంత్‌ తెలిపారు. రాష్ట్ర ప్రభుత్వంతో పాటు ముఖ్యమంత్రి దృష్టికి సమస్యలను తీసుకెళ్లి, ఉద్యోగులకు కచ్చితంగా న్యాయం జరిగేలా చూస్తానని భట్టి విక్రమార్క హామీ ఇచ్చినట్లు పేర్కొన్నారు.
