విద్యార్థి దశ నుంచే ఉన్నత లక్ష్యాలు ఎంచుకోవాలి
అభిరుచికి అనుగుణంగా కోర్సులు ఎంపిక చేసుకోవాలి
ప్రముఖ మానసిక నిపుణుడు పల్లె నాగేశ్వరరావు
పదో తరగతి తర్వాత ఉపాధి అవకాశాలపై అవగాహన
కాకతీయ, రాయపర్తి: విద్యార్థి దశలోనే ఉన్నత లక్ష్యాలను నిర్దేశించుకొని సరైన మార్గంలో పయనించినప్పుడే బంగారు భవిష్యత్తుకు బాటలు పడతాయని ప్రముఖ మానసిక నిపుణుడు పల్లె నాగేశ్వరరావు అన్నారు. శుక్రవారం మండలంలోని కొండూరు గ్రామ పీఎం శ్రీ జిల్లా పరిషత్‌ ఉన్నత పాఠశాలలో ప్రధానోపాధ్యాయురాలు కొణతం పద్మలత ఆధ్వర్యంలో నిర్వహించిన కెరీర్‌ గైడెన్స్‌ కార్యక్రమంలో ఆయన ముఖ్య అతిథిగా పాల్గొని మాట్లాడారు.
పదో తరగతి తర్వాత అందుబాటులో ఉన్న వివిధ కోర్సులు, ఉపాధి అవకాశాలపై విద్యార్థులకు అవగాహన కల్పించారు. ఇతరుల ఒత్తిడికి లోనుకాకుండా తమ అభిరుచి, ఆసక్తికి అనుగుణంగా కోర్సులను ఎంచుకోవాలని సూచించారు. పాఠ్యాంశాలను సులభంగా గుర్తుంచుకునే పద్ధతులు, పరీక్షల ఒత్తిడిని అధిగమించే మార్గాలు, ఏకాగ్రత పెంపొందించుకునే అంశాలను వివరించారు. విద్యార్థుల సర్వతోముఖాభివృద్ధి కోసం ఇటువంటి అవగాహన కార్యక్రమాలు నిర్వహిస్తున్నట్లు తెలిపారు. కార్యక్రమంలో సీనియర్‌ ఉపాధ్యాయులు వి.వి.ఆర్‌. ఆచార్య, కేసోజు సత్యనారాయణ, కటకం రఘు, శ్యాంసుందర్‌, నాగరాజు, అనితారాణి, అమర స్వర్ణ, శివకృష్ణ, రాజు, రమ, వీరస్వామి, నరేష్‌, స్వరూప పాల్గొన్నారు.
