మినీ స్టేడియంలో విద్యుత్ వెలుగులు
వాకర్లు, క్రీడాకారుల ఇబ్బందులకు పరిష్కారం
కాకతీయ, నర్సంపేట టౌన్: పట్టణంలోని మినీ స్టేడియంలో విద్యుత్ లైట్ల ఏర్పాటు చేయడంతో వాకర్లు, క్రీడాకారులకు చీకటి కష్టాలు తొలగనున్నాయి. గత కొంతకాలంగా స్టేడియంలో ఏర్పాటు చేసిన సోలార్ లైట్ల బ్యాటరీలు పాడవడంతో రాత్రి వేళల్లో లైట్లు వెలగడం లేదు. దీంతో తెల్లవారుజామున 4 నుంచి 6 గంటల వరకు, సాయంత్రం 6 నుంచి 8 గంటల వరకు వాకింగ్కు వచ్చే ప్రజలు, క్రీడా సాధన చేసే విద్యార్థులు తీవ్ర ఇబ్బందులు ఎదుర్కొంటున్నారు. ఈ సమస్యను మున్సిపల్ కమిషనర్, ఏఈ చంద్రమౌళి దృష్టికి తీసుకెళ్లడంతో వారు స్పందించారు. ఈ మేరకు ఆదివారం ఉదయం మినీ స్టేడియంలో సుమారు 300 మీటర్ల విద్యుత్ వైరు ఏర్పాటు చేసి, దాదాపు పది విద్యుత్ లైట్లను పాత సోలార్ స్టాండ్లతో పాటు ఇతర విద్యుత్ స్తంభాలకు అమర్చారు. దీంతో స్టేడియంలో విద్యుత్ వెలుగులు అందుబాటులోకి వచ్చాయి. సమస్య పరిష్కారానికి స్పందించిన మున్సిపల్ అధికారులకు వాకర్లు, క్రీడాకారులు కృతజ్ఞతలు తెలిపారు.
ఈ కార్యక్రమంలో మున్సిపల్ డెవలప్మెంట్ కమిటీ సభ్యులు, మాజీ ఫ్లోర్ లీడర్, డీసీసీ ఉపాధ్యక్షులు వేముల సంధ్యా సాంబయ్య గౌడ్, కాంగ్రెస్ పార్టీ జిల్లా నాయకులు దండం రతన్ కుమార్, పట్టణ ఉపాధ్యక్షులు వేముల సారంగం గౌడ్, పట్టణ కార్యదర్శి నాంపల్లి వెంకటేశ్వర్లు గౌడ్, విద్యార్థి సంఘం అధ్యక్షులు కటారి ఉత్తమ్ కుమార్, సీనియర్ నాయకులు మండరాజు గౌడ్, వాకర్స్ గన్నారం క్రాంతికుమార్ పీసీ, కుంటమల్ల అరవింద్ కుమార్, మున్సిపల్ సిబ్బంది గంట రామ్ రెడ్డి తదితరులు పాల్గొన్నారు.


