గూడూరు జయశ్రీకి న్యాయం చేయాలి
ఇంట్లో బంధించిన అత్త మీరాబాయిపై చర్యలు తీసుకోవాలి
రాసిచ్చిన ఇల్లు, ఆస్తులు ఇప్పించాలి
ప్రజా సంఘాల నాయకులు డాక్టర్ పెరుమాండ్ల రామకృష్ణ
కాకతీయ, మహబూబాబాద్ : న్యాయం కోసం ఇంటిలో బంధించబడి నిరసన చేస్తున్న గూడూరు జయశ్రీకి న్యాయం చేయాలని ప్రజా సంఘాల నాయకులు డాక్టర్ పెరుమాండ్ల రామకృష్ణ, చుంచు రాజేందర్, నేదునూరి జ్యోతి, మాదాసి సురేష్ కోరారు. గురువారం ప్రజా సంఘాల ఆధ్వర్యంలో సుబేదారి ఎస్సై సుమన్కు వినతిపత్రం అందజేశారు.
జయశ్రీపై గతంలో అత్త మీరాబాయి, భర్త రాధాకృష్ణ గృహహింసకు పాల్పడి అదనపు కట్నం తేవాలని వేధించారని, దీనిపై ఆమె సుబేదారి పోలీస్స్టేషన్లో కేసు పెట్టారని నాయకులు తెలిపారు. రాజీ మార్గంలో హనుమకొండ రాంనగర్లోని ఇల్లు, హనుమకొండ చౌరస్తాలోని షాపును నోటరీ పత్రం ద్వారా జయశ్రీకి రాసిచ్చారని పేర్కొన్నారు. అయితే 10 సంవత్సరాల తర్వాత కోర్టుకు వెళ్లి జయశ్రీతో పాటు మనవడు కార్తీక్, మనవరాలు తేజస్వినిని బయటకు పంపించారని తెలిపారు.
మూడు రోజుల క్రితం గుర్తుతెలియని వ్యక్తులతో జయశ్రీ సామాను తరలిస్తుండగా ఆమె, కూతురు అడ్డుకున్నారని, దీంతో మీరాబాయి, ఆమె కూతుర్లు, అల్లుళ్లు కలిసి ఇద్దరినీ ఇంట్లో బంధించి తాళం వేశారని నాయకులు పేర్కొన్నారు. బాధితులకు తిండి, నిద్ర లేక ఇబ్బందులు పడుతున్నారని తెలిపారు. వెంటనే జోక్యం చేసుకుని న్యాయం చేయాలని ఎస్సై సుమన్ను కోరారు. కార్యక్రమంలో కేరళ ప్రసాద్ పటేల్, జంపాల కళా, సంగెం స్వరూప, పొడిచేటి సరళ తదితరులు పాల్గొన్నారు.
