అసైన్డ్ భూములకు యాజమాన్య హక్కులు కల్పించడం అభినందనీయం
అర్హులైన దళితులకు భూమి పంపిణీ చేయాలి
పెండింగ్ భూ సమస్యలను పరిష్కరించాలి
కాంగ్రెస్ సీనియర్ నాయకుడు డాక్టర్ పెరుమాండ్ల రామకృష్ణ కృతజ్ఞతలు
కాకతీయ, హనుమకొండ : అసైన్డ్ భూములకు యాజమాన్య హక్కులు కల్పించడం, అర్హులైన దళితులకు భూమి పంపిణీ చేయాలనే నిర్ణయంపై ముఖ్యమంత్రి రేవంత్రెడ్డికి కృతజ్ఞతలు తెలుపుతున్నట్లు కాంగ్రెస్ సీనియర్ నాయకుడు, మాదిగ రాష్ట్ర గౌరవ అధ్యక్షుడు డాక్టర్ పెరుమాండ్ల రామకృష్ణ అన్నారు. శుక్రవారం హనుమకొండ అంబేద్కర్ సర్కిల్లో మాదిగ హక్కుల దండోరా, దళిత బహుజన సంఘాల ఆధ్వర్యంలో కృతజ్ఞత కార్యక్రమం నిర్వహించారు. అంబేద్కర్ విగ్రహానికి పూలమాల వేసి సీఎం నిర్ణయాన్ని స్వాగతించారు. ఈ సందర్భంగా డాక్టర్ రామకృష్ణ మాట్లాడుతూ అసైన్డ్ భూములకు యాజమాన్య హక్కులు కల్పించడం దళిత కుటుంబాల భూ హక్కులు, ఆత్మగౌరవం, ఆర్థిక భద్రతకు కీలకమన్నారు. గతంలో ఏర్పడిన భూ సమస్యలను సమగ్రంగా పరిశీలించి అర్హులకు న్యాయం చేయాలని కోరారు. అన్యాయంగా ఇతరుల పేర్లకు మారిన భూములను అసలు హక్కుదారులకు తిరిగి అందించాలని విజ్ఞప్తి చేశారు. అసైన్మెంట్ చట్టం–1977 ప్రకారం తనఖా రుణాలను పునరుద్ధరించాలని కోరారు. కార్యక్రమంలో మాదిగ హక్కుల దండోరా రాష్ట్ర అధ్యక్షుడు రేగుంట సునీల్ మాదిగ, రాజేందర్, సురేష్బాబూరావు, చుంచు రాజేందర్, మాదాసు సురేష్, మన్నే బాబురావు, రామచందర్, కేడేల ప్రసాద్, స్వామి, మందవీరస్వామి, రవీందర్, కుమారస్వామి తదితరులు పాల్గొన్నారు.
