ఉల్లాస్ తో మహిళల్లో అక్షర వెలుగు
47 కేంద్రాల్లో 3,700 మందికి పరీక్షలు
పరీక్షా కేంద్రాలను తనిఖీ చేసిన అదనపు కలెక్టర్ గణేశ్, ఉప కమిషనర్ సమ్మయ్య
కాకతీయ, వరంగల్ ప్రతినిధి : గ్రేటర్ వరంగల్ నగరంలో మహిళల్లో అక్షరాస్యత పెంపొందించే లక్ష్యంతో నిర్వహిస్తున్న ఉల్లాస్ – నవభారత్ సాక్షరత కార్యక్రమంలో భాగంగా ఆదివారం 47 పరీక్షా కేంద్రాల్లో సుమారు 3,700 మంది మహిళలకు పరీక్షలు నిర్వహించారు.
ఈ సందర్భంగా అదనపు కలెక్టర్ వై.వి. గణేశ్, జీడబ్ల్యూఎంసీ ఉప కమిషనర్ సమ్మయ్య కలిసి కొత్తవాడ, గిర్మాజీపేట, కరీమాబాద్ ప్రభుత్వ పాఠశాలల్లోని పరీక్షా కేంద్రాలను ఆకస్మికంగా తనిఖీ చేశారు. కేంద్రాల్లో కల్పించిన సౌకర్యాలు, హాజరు, నిర్వహణ తీరును పరిశీలించి, పరీక్ష రాస్తున్న మహిళలతో మాట్లాడారు.
అనంతరం అదనపు కలెక్టర్ మాట్లాడుతూ.. అక్షరాస్యత అనేది కేవలం చదవడం, రాయడం మాత్రమే కాదని, దైనందిన సమస్యలను అర్థం చేసుకుని పరిష్కరించుకోవడానికి, ప్రభుత్వ సంక్షేమ పథకాలను సద్వినియోగం చేసుకోవడానికి, ఆత్మవిశ్వాసంతో ముందుకు సాగడానికి దోహదపడుతుందన్నారు. మహిళలు అక్షరజ్ఞానం సాధించడం ద్వారా కుటుంబంతో పాటు సమాజ అభివృద్ధిలో కీలక పాత్ర పోషిస్తారని పేర్కొన్నారు.
ప్రతి ఏడాది సెప్టెంబర్, మార్చి నెలల్లో 15 ఏళ్లు పైబడిన మహిళలకు ఉల్లాస్ పరీక్షలు నిర్వహిస్తామని తెలిపారు. పరీక్షా కేంద్రాల్లో మహిళలు ఉత్సాహంగా పాల్గొని తమ అభ్యసన సామర్థ్యాన్ని ప్రదర్శించారని అధికారులు తెలిపారు.
కార్యక్రమంలో జిల్లా ఉల్లాస్ ఇన్ చార్జి నాగేశ్వర్ రావు, డీఎంసీలు రేణుక, రజిత, టీఎంసీ రమేష్, ఆర్పీలు, సీఓలు తదితరులు పాల్గొన్నారు.
