బీఆర్ఎస్ గుర్తింపు రద్దు చేయాలి
కేసీఆర్, కేటీఆర్, హరీశ్రావు, తాత మధుపై చట్టబద్ధ పోరాటం
దళితుల హక్కుల ఉల్లంఘనపై పదవులు, పార్టీలు చూడం
ఎక్కడ అన్యాయం జరిగినా బాధితుల పక్షాన నిలబడతాం
రాజ్యాంగమే మా ఆయుధం.. అన్యాయంపై రాజీ లేదు
బీఆర్ఎస్ గుర్తింపుపై ఎన్నికల చట్టాల ప్రకారం నిర్ణయం
మాదిగ హక్కుల దండోరా రాష్ట్ర గౌరవాధ్యక్షుడు, కాంగ్రెస్ నాయకుడు పెరుమాండ్ల రామకృష్ణ
కాకతీయ, తెలంగాణ బ్యూరో : దళితుల గౌరవం, ఆత్మగౌరవం, రాజ్యాంగ హక్కుల పరిరక్షణ విషయంలో ఎట్టి పరిస్థితుల్లోనూ రాజీపడేది లేదని మాదిగ హక్కుల దండోరా రాష్ట్ర గౌరవాధ్యక్షుడు, కాంగ్రెస్ నాయకుడు పెరుమాండ్ల రామకృష్ణ స్పష్టం చేశారు. కేసీఆర్, కేటీఆర్, హరీశ్రావు, తాత మధు తదితర ప్రజాప్రతినిధులపై తమ వినతిలో పేర్కొన్న అంశాలను సంబంధిత రాజ్యాంగ, చట్టబద్ధ సంస్థలు స్వతంత్రంగా పరిశీలించి చర్యలు తీసుకోవాలని డిమాండ్ చేశారు. బీఆర్ఎస్ పార్టీ గుర్తింపును ఎన్నికల చట్టాలు, నిబంధనల ప్రకారం పరిశీలించి రద్దు చేయాలని కోరారు. కేసీఆర్ ఇంటి వద్ద పసుపు నీళ్ల శుద్ధి, స్పీకర్పై అభ్యంతరకర పదజాలం వినియోగం తదితర అంశాలపై మాదిగ హక్కుల దండోరా రాష్ట్ర గౌరవాధ్యక్షుడు డాక్టర్ పెరుమాండ్ల రామకృష్ణ, రాష్ట్ర అధ్యక్షుడు రెగుంట సునీల్ మాదిగ సమర్పించిన వినతిని తెలంగాణ రాష్ట్ర ఎన్నికల సంఘం సెప్టెంబర్ 22న అవసరమైన చర్యల కోసం చీఫ్ ఎలక్టోరల్ అధికారికి పంపినట్లు వారు తెలిపారు.
దళితులపై వివక్షకు చోటులేదు
రాజ్యాంగం కల్పించిన సమాన గౌరవం, హక్కులను కాపాడాల్సిన బాధ్యత అందరిపైనా ఉందని డాక్టర్ పెరుమాండ్ల రామకృష్ణ అన్నారు. గద్వాలలో ప్రేమవివాహం విషయంలో దళితుని ఇల్లు కూల్చివేత, సిద్దిపేటలో వినాయక భోజనంలో దళితులకు వేరు వరుస, కరీంనగర్ జిల్లా సుల్తానాబాద్లో దళితుడిపై దాడి ఘటనలను ఆయన ఖండించారు. నిందితులపై చట్ట ప్రకారం చర్యలు తీసుకునే వరకు పోరాటం కొనసాగిస్తామన్నారు. దళితులపై ఎక్కడ, ఎవరి ద్వారా అన్యాయం జరిగినా మాదిగ హక్కుల దండోరా బాధితుల పక్షాన చట్టబద్ధంగా నిలబడుతుందని డాక్టర్ పెరుమాండ్ల రామకృష్ణ తెలిపారు. కులం పేరుతో అవమానించడం, దాడి చేయడం, బెదిరించడం, భూములు ఆక్రమించడం వంటి అంశాలపై సంబంధిత అధికారులను ఆశ్రయించి న్యాయం జరిగే వరకు పోరాటం కొనసాగిస్తామని స్పష్టం చేశారు. రాజ్యాంగమే తమ ఆయుధమని, అన్యాయంపై రాజీ లేదని పేర్కొన్నారు.
