ఎన్నికలు పారదర్శకంగా జరిగితే కాంగ్రెస్కే అధికారం
రాహుల్గాంధీ మాటలు నిజమని తేలింది
ఓట్ల తొలగింపుపై సమగ్ర దర్యాప్తు జరపాలి
జ్ఞానేశ్కుమార్పై చర్యలు తీసుకోవాలి
బీజేపీ ప్రజలకు క్షమాపణ చెప్పాలి
రాజ్యాంగ విలువలను కాపాడాలి
రెవెన్యూ, గృహనిర్మాణ, సమాచార పౌరసంబంధాల శాఖ మంత్రి పొంగులేటి శ్రీనివాసరెడ్డి
కాకతీయ,తెలంగాణ బ్యూరో : రాజ్యాంగబద్ధంగా, పారదర్శకంగా, దేశ పౌరుల ఓట్లు తొలగించకుండా న్యాయంగా ఇప్పటికిప్పుడు ఎన్నికలు నిర్వహిస్తే కాంగ్రెస్ పార్టీ అధికారంలోకి వస్తుందని, రాహుల్గాంధీ ప్రధాని అవుతారని రాష్ట్ర రెవెన్యూ, గృహనిర్మాణ, సమాచార పౌరసంబంధాల శాఖ మంత్రి పొంగులేటి శ్రీనివాసరెడ్డి అన్నారు. వనపర్తి జిల్లా కేంద్రంలో సోమవారం బీజేపీ ఓటు చోరీ విధానాన్ని నిరసిస్తూ జిల్లా కాంగ్రెస్ పార్టీ నిర్వహించిన కార్యక్రమంలో ఆయన మాట్లాడారు. బీజేపీ ప్రజల మద్దతుతో కాకుండా ఓట్లను దొంగిలించి అధికారంలోకి వచ్చిందని మంత్రి పొంగులేటి శ్రీనివాసరెడ్డి విమర్శించారు. ఎన్నికల సంఘాన్ని బీజేపీకి అనుకూలంగా ఉపయోగించుకుని ప్రజాస్వామ్యాన్ని దెబ్బతీశారని ఆరోపించారు. సీఈసీ జ్ఞానేశ్కుమార్ చర్యలపై దేశవ్యాప్తంగా ప్రశ్నలు తలెత్తుతున్నాయని పేర్కొన్నారు.
ఓట్ల తొలగింపుపై ఆరోపణలు
ఎస్ఐఆర్ ప్రక్రియలో కుట్ర ఉందని రాహుల్గాంధీ మొదటి నుంచి చెబుతున్నారని మంత్రి పొంగులేటి శ్రీనివాసరెడ్డి అన్నారు. ప్రతిపక్షాలు బలంగా ఉన్న ప్రాంతాల్లో డిజిటల్ ఫారాలు, నకిలీ లాగిన్ల ద్వారా అర్హులైన ఓటర్ల పేర్లను తొలగించారని ఆరోపించారు. ఈ వ్యవహారంపై సమగ్రంగా విచారణ జరిపించాలని డిమాండ్ చేశారు. ఓట్ల తొలగింపు వ్యవహారంలో బాధ్యులైన వారిపై చర్యలు తీసుకోవాలని మంత్రి పొంగులేటి శ్రీనివాసరెడ్డి డిమాండ్ చేశారు. సీఈసీ జ్ఞానేశ్కుమార్ను అరెస్టు చేయాలని, కేంద్ర ప్రభుత్వం ప్రజలకు క్షమాపణ చెప్పి రాజ్యాంగ విలువలను కాపాడాలని కోరారు. ఈ కార్యక్రమంలో కాంగ్రెస్ నాయకులు, కార్యకర్తలు భారీగా పాల్గొని ప్లకార్డులు, బ్యానర్లతో నిరసన తెలిపారు.
