కేసీఆర్ ఫామ్హౌస్లో కాదు.. ప్రజల గుండెల్లో ఉన్నారు
ప్రజల్లో ఆయనపై ఉన్న అభిమానం మరోసారి స్పష్టమైంది
భూపాలపల్లి మాజీ ఎమ్మెల్యే గండ్ర వెంకటరమణారెడ్డి
పార్టీ నేతలు, కార్యకర్తలతో కలిసి సినిమాను వీక్షించిన మాజీ ఎమ్మెల్యే
కాకతీయ, భూపాలపల్లి : మాజీ ముఖ్యమంత్రి కేసీఆర్ ఫామ్హౌస్లో లేరని, ప్రజల గుండెల్లో ఉన్నారని భూపాలపల్లి మాజీ ఎమ్మెల్యే గండ్ర వెంకటరమణారెడ్డి అన్నారు. భూపాలపల్లి పట్టణంలోని ఆనంద్ థియేటర్లో ప్రదర్శితమవుతున్న ‘ది ప్యారడైజ్’ సినిమాను సోమవారం బీఆర్ఎస్ నాయకులు, కార్యకర్తలతో కలిసి ఆయన వీక్షించారు. సినిమా ప్రదర్శన సందర్భంగా కార్యకర్తలతో కలిసి సరదాగా గడిపారు. సినిమాలో కేసీఆర్ పాత్ర తెరపై కనిపించిన సమయంలో ప్రేక్షకులు, అభిమానులు పెద్ద ఎత్తున కేరింతలు కొట్టారు. ఈ సందర్భంగా గండ్ర వెంకటరమణారెడ్డి మాట్లాడుతూ కేసీఆర్పై ప్రజలకు, తెలంగాణ సమాజానికి ఉన్న అభిమానం ఏ స్థాయిలో ఉందో థియేటర్లో వినిపించిన కేరింతలే చెబుతున్నాయన్నారు. కేసీఆర్ పాత్రకు ప్రేక్షకుల నుంచి వచ్చిన స్పందన ప్రజల్లో ఆయనపై ఉన్న అనుబంధం, అభిమానాన్ని తెలియజేస్తోందన్నారు. అలాగే కాంగ్రెస్ పాలనపై ప్రజల్లో అవిశ్వాసం ఏర్పడిందని పేర్కొన్నారు. కార్యక్రమంలో బీఆర్ఎస్ నాయకులు, కార్యకర్తలు, అభిమానులు పాల్గొన్నారు.
