రెసిడెన్షియల్ విద్యాసంస్థల్లో భద్రతకు అత్యంత ప్రాధాన్యం
కలెక్టర్లు ఆకస్మిక తనిఖీలు నిర్వహించి లోపాలను సరిచేయాలి
దసరా నాటికి ప్రతి విద్యార్థికి 2 జతల యూనిఫారాలు
రాష్ట్ర ప్రభుత్వ ప్రధాన కార్యదర్శి సంజయ్ జాజు
కాకతీయ, వరంగల్ బ్యూరో : రాష్ట్రంలోని రెసిడెన్షియల్ విద్యాసంస్థల్లో విద్యార్థుల భద్రత, ఆరోగ్యం, విద్య, మౌలిక వసతులపై ప్రత్యేక దృష్టి సారించాలని రాష్ట్ర ప్రభుత్వ ప్రధాన కార్యదర్శి సంజయ్ జాజు జిల్లా కలెక్టర్లను ఆదేశించారు. సోమవారం అన్ని జిల్లాల కలెక్టర్లతో వీడియో కాన్ఫరెన్స్ ద్వారా నిర్వహించిన సమీక్షలో ఆయన మాట్లాడారు. కలెక్టర్లు రెసిడెన్షియల్ విద్యాసంస్థలను క్రమం తప్పకుండా ఆకస్మికంగా తనిఖీ చేసి ఆహారం నాణ్యత, పారిశుధ్యం, ఉపాధ్యాయులు, విద్యార్థుల హాజరు, మౌలిక వసతులను పరిశీలించాలని సూచించారు. ఫుడ్ పాయిజనింగ్, ఎలుకలు, పాముకాటు వంటి ఘటనలు పునరావృతం కాకుండా ముందస్తు చర్యలు చేపట్టాలని, ఆహార పదార్థాల తయారీ, నిల్వ, వినియోగంలో నిర్దేశిత ప్రమాణాలు పాటించాలని ఆదేశించారు. విద్యాసంస్థల పరిస్థితులను పర్యవేక్షించే డ్యాష్బోర్డ్ను కలెక్టర్లు క్రమం తప్పకుండా పరిశీలించి, సౌకర్యాలు, లోపాలు, పరిష్కార చర్యలను ఇంటిగ్రేటెడ్ పోర్టల్లో నమోదు చేయాలని తెలిపారు. శీతాకాలాన్ని దృష్టిలో ఉంచుకుని వేడి నీరు, దుప్పట్లు అందుబాటులో ఉంచాలన్నారు. అద్దె భవనాల యజమానులతో సమావేశమై అవసరమైన మరమ్మతులు చేయించాలని సూచించారు. దసరా నాటికి ప్రతి విద్యార్థికి 2 జతల కుట్టిన యూనిఫారాలు అందేలా చర్యలు వేగవంతం చేయాలని ఆదేశించారు.
హాస్టళ్లలో ప్రత్యేక పారిశుధ్య డ్రైవ్
వీడియో కాన్ఫరెన్స్ అనంతరం కలెక్టర్ చాహత్ బాజ్పాయి అధికారులతో మాట్లాడుతూ అక్టోబర్ 1 నుంచి 15 వరకు అన్ని సంక్షేమ హాస్టళ్లలో ప్రత్యేక పారిశుధ్య డ్రైవ్ నిర్వహించాలని ఆదేశించారు. బుష్ క్లియరెన్స్ చేపట్టి పరిసరాలను పరిశుభ్రంగా ఉంచాలని, అధికారులు ప్రతి హాస్టల్ను సందర్శించి మౌలిక వసతులు, మెనూ ప్రకారం భోజనం అందుతున్న తీరును పరిశీలించాలని సూచించారు. సమావేశంలో అదనపు కలెక్టర్, జడ్పీ సీఈవో శేషాద్రి, ట్రైనీ కలెక్టర్ రోహిత్ నేత, డీఈఓ గిరిరాజ్ గౌడ్, సంక్షేమ శాఖల అధికారులు పాల్గొన్నారు
