వరంగల్ తూర్పులో అభివృద్ధి శూన్యం
బీజేపీ నేత ఎర్రబెల్లి ప్రదీప్రావు
ఎమ్మెల్యే కనబడటం లేదంటూ బీజేపీ వినూత్న నిరసన
బూడిద గుమ్మడికాయలు కొట్టి కలెక్టరేట్ను ప్రారంభించిన బీజేపీ నేతలు
కాకతీయ, వరంగల్ ప్రతినిధి : వరంగల్ తూర్పు నియోజకవర్గంలో అభివృద్ధి శూన్యంగా ఉందని బీజేపీ నేత ఎర్రబెల్లి ప్రదీప్రావు విమర్శించారు. ఎమ్మెల్యే, మంత్రి కొండా సురేఖ కనబడటం లేదంటూ సోమవారం బీజేపీ ఆధ్వర్యంలో వినూత్న నిరసన చేపట్టారు. ఓసిటీలోని ప్రదీప్రావు నివాసం నుంచి నూతన వరంగల్ జిల్లా సమీకృత కలెక్టరేట్ వరకు భారీ ర్యాలీ నిర్వహించి, అక్కడ బూడిద గుమ్మడికాయలు కొట్టారు. అనంతరం బీజేపీ శ్రేణులే కలెక్టరేట్ను అధికారికంగా ప్రారంభించినట్లు ప్రకటించారు. వరంగల్ జిల్లా సమీకృత కలెక్టరేట్ వద్ద కాకతీయుల కీర్తి తోరణం ఏర్పాటు చేయకపోవడం బాధాకరమని ప్రదీప్రావు అన్నారు. ఇది చరిత్రను, కాకతీయుల కీర్తిని అవమానించడమేనని పేర్కొన్నారు. వరంగల్ జిల్లా ఏర్పాటైనా ప్రభుత్వ కార్యాలయాలు హనుమకొండలోనే కొనసాగుతున్నాయని, చివరకు వరంగల్ తూర్పు ఎమ్మెల్యే, మంత్రి కొండా సురేఖ నివాసం కూడా హనుమకొండలోనే ఉందని అన్నారు. తూర్పు నియోజకవర్గంలో చిన్నపాటి వర్షానికే ముంపు సమస్య ఏర్పడుతోందని, ఎంజీఎం ఆసుపత్రి శిథిలావస్థకు చేరినా సూపర్ స్పెషాలిటీ ఆసుపత్రిని ప్రారంభించకపోవడం ప్రభుత్వ నిర్లక్ష్యమని విమర్శించారు. వరంగల్ కలెక్టరేట్, నూతన ఆసుపత్రిని వెంటనే ప్రారంభించి, పెండింగ్లో ఉన్న బస్స్టాండ్ నిర్మాణాన్ని వేగవంతం చేయాలని డిమాండ్ చేశారు. కార్యక్రమంలో జిల్లా అధ్యక్షుడు గంటా రవి, బీజేపీ నాయకులు, కార్యకర్తలు పాల్గొన్నారు.
