రైతులకు 3 ఫేజ్‌ కరెంట్‌ ఇవ్వాల్సిందే!
విద్యుత్‌ కోతలతో పంట నష్టంపై సీపీఎం ఆందోళన
నష్టపోయిన రైతులకు ఎకరాకు రూ.20 వేల పరిహారం ఇవ్వాలి
సీపీఎం సిద్దిపేట జిల్లా కార్యదర్శి అముదాల మల్లారెడ్డి డిమాండ్‌
కాకతీయ, చేర్యాల : వ్యవసాయానికి నిరంతరాయంగా మూడు ఫేజ్‌ల విద్యుత్‌ సరఫరా చేయాలని, విద్యుత్‌ కోతలతో పంటలు నష్టపోయిన రైతులకు ఎకరాకు రూ.20 వేల చొప్పున పరిహారం చెల్లించాలని సీపీఎం నాయకులు డిమాండ్‌ చేశారు. రైతుల సమస్యలను పరిష్కరించాలని కోరుతూ చేర్యాలలో సీపీఎం ఆధ్వర్యంలో భారీ బైక్‌ ర్యాలీ నిర్వహించారు. పార్టీ కార్యాలయం నుంచి ప్రారంభమైన ర్యాలీ ఏడీఈ కార్యాలయం వరకు కొనసాగింది. అనంతరం విద్యుత్‌ కార్యాలయం ఎదుట ధర్నా నిర్వహించి, తమ డిమాండ్లతో కూడిన వినతిపత్రాన్ని ఏడీఈ వెంకట్‌గౌడ్‌కు అందజేశారు. ఈ సందర్భంగా సీపీఎం సిద్దిపేట జిల్లా కార్యదర్శి అముదాల మల్లారెడ్డి మాట్లాడుతూ సాగు సమయంలో రైతులకు నిరంతరాయంగా మూడు ఫేజ్‌ల విద్యుత్‌ అందించడం ప్రభుత్వ బాధ్యతని అన్నారు. విద్యుత్‌ కోతల కారణంగా పంటలు దెబ్బతిని రైతులు తీవ్రంగా నష్టపోతున్నారని ఆవేదన వ్యక్తం చేశారు. నష్టపోయిన రైతులను ప్రభుత్వం వెంటనే ఆదుకోవాలని, ఎకరాకు రూ.20 వేల పరిహారం చెల్లించాలని కోరారు. రైతుల సమస్యల పట్ల నిర్లక్ష్యంగా వ్యవహరించే విద్యుత్‌ అధికారులపై చర్యలు తీసుకోవాలని డిమాండ్‌ చేశారు. భవిష్యత్తులో విద్యుత్‌ కోతలతో రైతులకు నష్టం కలగకుండా ప్రభుత్వం, అధికారులు తగిన చర్యలు చేపట్టాలని స్పష్టం చేశారు. రైతులకు న్యాయం జరిగే వరకు తమ పోరాటాన్ని కొనసాగిస్తామని నాయకులు తెలిపారు. ఈ కార్యక్రమంలో రైతులు, సీపీఎం జిల్లా కార్యదర్శివర్గ సభ్యులు, జిల్లా కమిటీ సభ్యులు, వివిధ మండలాల నాయకులు, శాఖ కార్యదర్శులు, పార్టీ కార్యకర్తలు పాల్గొన్నారు.
