పండుగ సాయన్న ఆశయాలను నెర‌వేర్చాలి
జనగామ కాంగ్రెస్‌ నియోజకవర్గ ఇన్‌ఛార్జి కొమ్మూరి ప్రతాప్‌రెడ్డి
కాకతీయ, చేర్యాల: అణగారిన వర్గాల హక్కుల కోసం పోరాడిన పండుగ సాయన్న ఆశయాలను భావితరాలకు తెలియజేయాలని జనగామ కాంగ్రెస్‌ నియోజకవర్గ ఇన్‌ఛార్జి కొమ్మూరి ప్రతాప్‌రెడ్డి అన్నారు. చేర్యాల మండల కేంద్రంలోని కాంగ్రెస్‌ పార్టీ కార్యాలయంలో పండుగ సాయన్న ముదిరాజ్‌ 174వ జయంతి వేడుకలను ఘనంగా నిర్వహించారు. ఈ సందర్భంగా ఆయన చిత్రపటానికి ప్రతాప్‌రెడ్డి పూలమాల వేసి నివాళులర్పించారు. అనంతరం మాట్లాడుతూ జమీందార్లు, జాగీర్దార్లు, భూస్వాముల దోపిడీకి వ్యతిరేకంగా పోరాడి నిరుపేదలు, బడుగు బలహీన వర్గాల హక్కుల కోసం నిలబడిన గొప్ప పోరాటయోధుడు పండుగ సాయన్న అని కొనియాడారు. సామాజిక న్యాయం, సమానత్వం కోసం ఆయన చేసిన పోరాటాలు, త్యాగాలు చిరస్మరణీయమని పేర్కొన్నారు. ఆయన స్ఫూర్తిని ఆదర్శంగా తీసుకుని సమాజ అభ్యున్నతికి ప్రతి ఒక్కరూ కృషి చేయాలని పిలుపునిచ్చారు. కార్యక్రమంలో చేర్యాల వ్యవసాయ మార్కెట్‌ కమిటీ చైర్మన్‌ కొమ్మూరి ప్రశాంత్‌రెడ్డి, కొమురవెల్లి మండల కాంగ్రెస్‌ అధ్యక్షుడు మహాదేవుని శ్రీనివాస్‌, చేర్యాల మండల అధ్యక్షుడు మంజ మల్లేశం, వైస్‌ చైర్మన్‌ బోయిని శ్రీనివాస్‌, వెంకటరెడ్డి, మారెళ్ల భాస్కర్‌రెడ్డితో పాటు పలువురు కాంగ్రెస్‌ నాయకులు, సర్పంచులు, మార్కెట్‌ కమిటీ సభ్యులు, యూత్‌ కాంగ్రెస్‌ నాయకులు పాల్గొన్నారు.
