విద్యార్థులకు పోలీస్ విధులపై అవగాహన
* చేర్యాల పోలీస్ స్టేషన్‌లో విద్యార్థులకు ఓపెన్ హౌస్
* పోలీసుల విధులు, స్టేషన్‌లో జరిగే ప్రక్రియలపై అవగాహన కల్పించిన ఎస్‌ఐ అపూర్వ రెడ్డి
కాకతీయ,చేర్యాల: చేర్యాల పోలీస్ స్టేషన్‌లో శుక్రవారం ప్రైవేట్ పాఠశాలల విద్యార్థులతో ఓపెన్ హౌస్ కార్యక్రమాన్ని నిర్వహించారు. ఈ కార్యక్రమంలో చేర్యాల ఎస్‌ఐ అపూర్వ రెడ్డి విద్యార్థులకు పోలీసుల విధులు, బాధ్యతలు, పోలీస్ స్టేషన్‌లో జరిగే వివిధ ప్రక్రియలపై వివరంగా అవగాహన కల్పించారు.పోలీస్ స్టేషన్‌కు ఒక దరఖాస్తు వచ్చినప్పటి నుంచి దానిపై పోలీసులు చేపట్టే చర్యలు, ఫిర్యాదుల స్వీకరణ, దర్యాప్తు తదితర అంశాలను విద్యార్థులకు సులభంగా అర్థమయ్యేలా ఎస్‌ఐ వివరించారు. అలాగే పోలీస్ శాఖలో విధులు నిర్వహిస్తూ ప్రాణాలు కోల్పోయిన పోలీసు సిబ్బంది సేవలను స్మరించుకుంటూ వారికి ఘన నివాళులు అర్పించారు.ఈ సందర్భంగా విద్యార్థులు పోలీస్ స్టేషన్‌లోని వివిధ విభాగాలు, పోలీసుల విధులు, ప్రజలకు అందించే సేవల గురించి తెలుసుకున్నారు. పోలీసులపై విద్యార్థుల్లో అవగాహన పెంపొందించడంతో పాటు, పోలీస్ శాఖ ప్రజలకు ఎలా సేవలందిస్తుందో ప్రత్యక్షంగా తెలుసుకునే అవకాశం కల్పించడమే ఓపెన్ హౌస్ కార్యక్రమం ముఖ్య ఉద్దేశమని తెలిపారు.విద్యార్థులు ఉత్సాహంగా కార్యక్రమంలో పాల్గొని పోలీసుల విధులపై పలు విషయాలను తెలుసుకున్నారు.
