తీవ్ర వాయుగుండంగా బలపడనున్న అల్పపీడనం

బంగాళాఖాతంలో తుఫాన్‌ 
తీవ్ర వాయుగుండంగా బలపడనున్న అల్పపీడనం
ఏపీకి భారీ వర్ష సూచన.. తీరం వెంబడి బలమైన ఈదురుగాలులు

కాకతీయ, విశాఖపట్నం : బంగాళాఖాతంలో ఏర్పడిన అల్పపీడనం వాయుగుండంగా బలపడింది. తూర్పు మధ్య ఆగ్నేయ బంగాళాఖాతంలో కేంద్రీకృతమైన ఈ వాయుగుండం ఆదివారం తీవ్ర వాయుగుండంగా, సోమవారం తుఫాన్‌గా మారే అవకాశం ఉన్నట్లు అంచనా. తుఫాన్‌గా బలపడిన తర్వాత దీనికి ‘అర్నాబ్‌’గా నామకరణం చేయనున్నట్లు సమాచారం. మంగళవారం ఉదయం నాటికి తీవ్ర తుఫాన్‌గా బలపడే అవకాశముందని అంచనా వేస్తున్నారు. ప్రస్తుతం ఈ వాయుగుండం విశాఖపట్నానికి 860 కిలోమీటర్లు, కాకినాడకు 950 కిలోమీటర్లు, బాపట్లకు 1,130 కిలోమీటర్ల దూరంలో కేంద్రీకృతమై ఉన్నట్లు సమాచారం. బుధవారం యానాం సమీపంలో తీరం దాటే అవకాశం ఉందని అంచనా వేస్తున్నారు. తుఫాన్‌ ప్రభావంతో సోమవారం నుంచి మూడు రోజుల పాటు ఆంధ్రప్రదేశ్‌లో భారీ వర్షాలు కురిసే అవకాశం ఉందని సూచిస్తున్నారు. తీరం దాటే సమయంలో గంటకు 115 నుంచి 125 కిలోమీటర్ల వేగంతో ఈదురుగాలులు వీచే అవకాశం ఉన్నట్లు పేర్కొంటున్నారు. తుఫాన్‌ దిశ, తీవ్రత, తీరం దాటే ప్రాంతంపై అధికారిక వాతావరణ శాఖ తాజా హెచ్చరికలను ప్రజలు గమనించాలని సూచిస్తున్నారు.