గుడుంబా విక్రయాలపై పోలీసుల ఉక్కుపాదం..
*ఒకే రోజు ఆరు కేసులు నమోదు.. 54 లీటర్ల గుడుంబా స్వాధీనం..
*అక్రమ తయారీ, విక్రయాలకు పాల్పడితే కఠిన చర్యలు తప్పవు..
*గీసుగొండ సీఐ విశ్వేశ్వర్ హెచ్చరిక
కాకతీయ, గీసుగొండ: గుడుంబా అక్రమ తయారీ, విక్రయాలపై గీసుగొండ పోలీసులు ఉక్కుపాదం మోపారు. ప్రత్యేక తనిఖీలు నిర్వహించి ఒకే రోజు ఆరు కేసులు నమోదు చేయడంతో పాటు 54 లీటర్ల నిషేధిత గుడుంబాను స్వాధీనం చేసుకున్నారు. ఈ సందర్భంగా గీసుగొండ సీఐ విశ్వేశ్వర్ మాట్లాడుతూ.. మండలంలో గుడుంబా తయారీ, విక్రయాలు, అక్రమ రవాణాను పూర్తిస్థాయిలో అరికట్టేందుకు ప్రత్యేక నిఘా ఏర్పాటు చేసినట్లు తెలిపారు. నవంబర్ 15న గీసుగొండ పోలీస్ స్టేషన్ పరిధిలోని జనపాక, గీసుగొండ గ్రామాల్లో పోలీసులు తనిఖీలు నిర్వహించి అక్రమంగా గుడుంబా విక్రయిస్తున్న ఆరుగురిని పట్టుకున్నట్లు వెల్లడించారు. వీరిపై తెలంగాణ రాష్ట్ర నిషేధిత మద్య నియంత్రణ చట్టం కింద ఆరు కేసులు నమోదు చేసి, సుమారు రూ.13,500 విలువైన 54 లీటర్ల గుడుంబాను స్వాధీనం చేసుకున్నట్లు తెలిపారు. జనపాక గ్రామంలో నాలుగు కేసులు నమోదు చేసి 26 లీటర్లు, గీసుగొండ గ్రామంలో రెండు కేసులు నమోదు చేసి 28 లీటర్ల గుడుంబాను స్వాధీనం చేసుకున్నట్లు వివరించారు. కేసుల్లో మూడూ విజయ (60), భర్త దాస్రు, ఆదర్శనగర్, స్తంభంపల్లి ఖిలా, వరంగల్ నివాసి, స్వగ్రామం రాములు తండా, గూడూరు మండలం; ధరావత్ విజయ (40), భర్త కుమార్, జనపాక గ్రామం; బోడ సురేష్ (30), తండ్రి బిచ్చ్యా, జనపాక గ్రామం; ఎల్లందుల రాకేష్ (30), తండ్రి నిర్మల్, గరీబ్నగర్, గొర్రెకుంట; పల్లకొండ సాంబరాజు (50), తండ్రి సైలూ, గీసుగొండ గ్రామం; పులిచెరి శైలజ (42), భర్త శ్రీను, గీసుగొండ గ్రామానికి చెందిన వారిగా గుర్తించినట్లు తెలిపారు. పట్టుబడిన నిందితులను స్థానిక తహసీల్దార్ ఎదుట హాజరుపరిచి సత్ప్రవర్తన కోసం బైండోవర్ చేసినట్లు సీఐ వెల్లడించారు. గుడుంబా ఎక్కడ తయార వుతోంది,ఎక్కడి నుంచి గ్రామాలకు సరఫరా అవుతోంది అనే వివరాలను సేకరిస్తున్నామని,తయారీ దారులు,సరఫరాదారులపై కూడా కేసులు నమోదు చేస్తామని హెచ్చరించారు. గుడుంబా విక్రయాలు ప్రజల ఆరోగ్యానికి, పేద, సామాన్య కుటుంబాల ఆర్థిక పరిస్థితికి తీవ్ర నష్టం కలిగిస్తాయని, ఇలాంటి అక్రమ కార్యకలాపాలకు పాల్పడే వారిని ఎట్టి పరిస్థితుల్లోనూ ఉపేక్షించేది లేదన్నారు. ఎవరైనా గుడుంబా తయారు చేసినా, విక్రయించినా లేదా నిల్వ ఉంచినా వెంటనే పోలీసులకు 112 లేదా 8712685031 నంబర్కు సమాచారం అందించాలని కోరారు. సమాచారం ఇచ్చిన వారి వివరాలను గోప్యంగా ఉంచుతామని, గుడుంబా రహిత గ్రామాల నిర్మాణానికి ప్రజలు పోలీసులకు సహకరించాలని సీఐ విశ్వేశ్వర్ విజ్ఞప్తి చేశారు.

