అసైన్డ్ భూముల హక్కుల సాధనే లక్ష్యం!
తెలంగాణ భూ రక్షణ సమితి సిద్దిపేట జిల్లా ప్రధాన కార్యదర్శిగా వల్లూరి శ్రీనివాస్ నియామకం
కాకతీయ,చేర్యాల : తెలంగాణ భూ రక్షణ సమితి సిద్దిపేట జిల్లా ప్రధాన కార్యదర్శిగా చేర్యాల మండలం వీరన్నపేట గ్రామ మాజీ సర్పంచ్ వల్లూరి శ్రీనివాస్ నియమితులయ్యారు. ఈ మేరకు సమితి రాష్ట్ర వ్యవస్థాపక అధ్యక్షులు బుగ్గ మైసన్న చేతుల మీదుగా నియామక పత్రాన్ని అందజేశారు. రాష్ట్ర ఉపాధ్యక్షులు మిద్దెపాక సిద్దులు, జిల్లా అధ్యక్షులు వేముగంటి వెంకటస్వామి ఆధ్వర్యంలో ఈ నియామక కార్యక్రమం జరిగింది.ఈ సందర్భంగా వల్లూరి శ్రీనివాస్ మాట్లాడుతూ తనపై నమ్మకంతో జిల్లా ప్రధాన కార్యదర్శిగా బాధ్యతలు అప్పగించిన రాష్ట్ర, జిల్లా నాయకత్వానికి కృతజ్ఞతలు తెలిపారు. జిల్లాలోని అసైన్డ్ భూముల లబ్ధిదారులను ఏకతాటిపైకి తీసుకొచ్చి, భూ రక్షణ సమితి కమిటీలను బలోపేతం చేస్తానన్నారు. అసైన్డ్ భూములకు పూర్తిస్థాయి యాజమాన్య హక్కులు కల్పించే వరకు నిరంతరం పోరాటం కొనసాగిస్తానని స్పష్టం చేశారు.అలాగే నవంబర్ 19న సిద్దిపేటలో మాజీ ప్రధాని ఇందిరాగాంధీ జయంతి సందర్భంగా నిర్వహించనున్న బహిరంగ సభలో అసైన్డ్ భూములకు పూర్తిస్థాయి యాజమాన్య హక్కులు కల్పిస్తామని ప్రభుత్వం స్పష్టమైన ప్రకటన చేయాలని డిమాండ్ చేశారు.వల్లూరి శ్రీనివాస్కు జిల్లా ప్రధాన కార్యదర్శిగా బాధ్యతలు లభించడంపై జిల్లా నాయకులు, కార్యకర్తలు హర్షం వ్యక్తం చేస్తూ అభినందనలు తెలిపారు.

