నల్లగొండ రైతు మహాసభలను జయప్రదం చేయండి
*నవంబర్ 15న రైతు బహిరంగ సభకు వేలాదిగా తరలిరండి
: చుక్కా రాములు
కాకతీయ,చేర్యాల: అఖిల భారత 36వ రైతు మహాసభలను జయప్రదం చేయాలని సీఐటీయూ రాష్ట్ర అధ్యక్షులు చుక్కా రాములు పిలుపునిచ్చారు. నవంబర్ 15 నుంచి 18 వరకు నల్లగొండలో జరగనున్న రైతు మహాసభల సందర్భంగా, 15న నిర్వహించే భారీ బహిరంగ సభకు రైతులు వేలాదిగా తరలిరావాలని కోరారు.ఈ సందర్భంగా కొమురవెల్లి మండల కేంద్రంలో నిర్వహించిన ప్రచార ట్రాక్టర్ ర్యాలీని చుక్కా రాములు ప్రారంభించారు. కేంద్ర, రాష్ట్ర ప్రభుత్వాల రైతు వ్యతిరేక విధానాలతో వ్యవసాయ రంగం సంక్షోభంలో కూరుకుపోతోందని విమర్శించారు. రైతులు పండించే ప్రతి పంటకు గిట్టుబాటు ధర కల్పించాలని, రైతు వ్యతిరేక బిల్లులను ఉపసంహరించుకోవాలని డిమాండ్ చేశారు. రైతుల సమస్యల పరిష్కారం కోసం ఐక్యంగా పోరాడాలని పిలుపునిచ్చారు.తెలంగాణ రైతు సంఘం రాష్ట్ర కమిటీ సభ్యులు ఆముదాల మల్లారెడ్డి మాట్లాడుతూ రైతు సమస్యలపై ఉద్యమాలకు రైతులంతా సిద్ధం కావాలని కోరారు. ఈ ట్రాక్టర్ ర్యాలీ కొమురవెల్లి నుంచి చేర్యాల వీరభద్ర థియేటర్ సెంటర్ వరకు కొనసాగింది.ఈ కార్యక్రమంలో తెలంగాణ రైతు సంఘం సిద్దిపేట జిల్లా కార్యదర్శి కొంగరి వెంకట మావో, ప్రజా సంఘాల నాయకులు, రైతు సంఘం నాయకులు, కార్యకర్తలు తదితరులు పాల్గొన్నారు.
