ఐబొమ్మ రవికి బెయిల్… నెట్‌పై ‘నో ఎంట్రీ’!
పైరసీ కేసులో నిందితుడికి ఉపశమనం
ఇంటర్నెట్ వినియోగంపై కఠిన ఆంక్షలు
కోర్టుకు పాస్‌పోర్ట్ సరెండర్ చేయాలని ఆదేశాలు
విదేశీ ప్రయాణాలపై పూర్తిస్థాయి ఆంక్షలు
70 పైరసీ వెబ్‌సైట్లు బ్లాక్ చేసిన పోలీసులు
బ్యాంక్ ఖాతాల్లో రూ.2 కోట్ల లావాదేవీల గుర్తింపు
కొన‌సాగ‌నున్న దర్యాప్తు..
కాకతీయ, తెలంగాణ బ్యూరో : టాలీవుడ్‌తో పాటు ఇతర చిత్ర పరిశ్రమలకు భారీ నష్టం కలిగించిన ప్రముఖ పైరసీ వెబ్‌సైట్ ‘ఐబొమ్మ’ వ్యవస్థాపకుడు రవికి కోర్టు షరతులతో కూడిన బెయిల్ మంజూరు చేసింది. సినిమా పైరసీ కేసులో అరెస్టై చాలా రోజులుగా జైలులో ఉన్న రవికి ఉపశమనం లభించినప్పటికీ, భవిష్యత్తులో మళ్లీ ఇలాంటి కార్యకలాపాలకు పాల్పడకుండా ఉండేందుకు న్యాయస్థానం కఠిన నిబంధనలు విధించింది. ముఖ్యంగా ఇంటర్నెట్ వినియోగంపై ప్రత్యేక ఆంక్షలు విధించడం ఈ కేసులో ప్రాధాన్యత సంతరించుకుంది. బెయిల్ షరతుల ప్రకారం రవి తన పాస్‌పోర్ట్‌ను వెంటనే కోర్టులో సరెండర్ చేయాలని ఆదేశించారు. విచారణ పూర్తయ్యే వరకు కోర్టు అనుమతి లేకుండా దేశం బయటకు వెళ్లరాదని స్పష్టం చేశారు. విదేశాలకు వెళ్లే అవకాశాన్ని పూర్తిగా నిరోధిస్తూ అతనిపై ప్రయాణ ఆంక్షలు విధించారు. అదేవిధంగా ఈ కేసులో భాగంగా రవి క్రమం తప్పకుండా పోలీసుల ఎదుట హాజరవుతూ విచారణకు సహకరించాలని కోర్టు ఆదేశించింది.
నెట్ వినియోగంపై కట్టుదిట్టమైన ఆంక్షలు
బెయిల్‌లో అత్యంత కీలకమైన షరతుగా ఇంటర్నెట్ వినియోగంపై కోర్టు కఠిన నిబంధనలు విధించింది. పోలీసుల ముందస్తు అనుమతి లేకుండా రవి ఎలాంటి ఇంటర్నెట్ సేవలను వినియోగించకూడదని స్పష్టం చేసింది. అత్యవసర పరిస్థితుల్లో మాత్రమే సంబంధిత పోలీసు అధికారుల అనుమతితో ఇంటర్నెట్ ఉపయోగించాల్సి ఉంటుంది. రవికి ఉన్న సాంకేతిక పరిజ్ఞానం, గతంలో వెబ్‌సైట్ల నిర్వహణలో అతని పాత్రను దృష్టిలో ఉంచుకుని ఈ నిర్ణయం తీసుకున్నట్లు తెలుస్తోంది. అతను వినియోగించే మొబైల్ ఫోన్లు, డిజిటల్ పరికరాలపై కూడా పోలీసులు నిరంతర నిఘా కొనసాగించే అవకాశం ఉంది. సినిమా పైరసీ కేసులో భాగంగా పోలీసులు విస్తృత దర్యాప్తు చేపట్టారు. రవి నిర్వహిస్తున్న ఐబొమ్మ వెబ్‌సైట్‌తో పాటు అనుబంధంగా నడిపిన దాదాపు 70 పైరసీ వెబ్‌సైట్లను గుర్తించి బ్లాక్ చేశారు. ప్రస్తుతం ఐబొమ్మ వెబ్‌సైట్ పూర్తిగా నిలిపివేయబడింది. కొత్త సినిమాలు విడుదలైన గంటల్లోనే వాటిని అక్రమంగా అప్‌లోడ్ చేసి చిత్ర పరిశ్రమకు కోట్లాది రూపాయల నష్టం కలిగించినట్లు పోలీసులు గుర్తించారు.
బ్యాంక్ ఖాతాలు ఫ్రీజ్..
రవికి సంబంధించిన బ్యాంక్ ఖాతాలను కూడా పోలీసులు ఫ్రీజ్ చేశారు. విచారణలో భాగంగా అతని ఖాతాల్లో సుమారు రూ.2 కోట్ల వరకు లావాదేవీలు జరిగినట్లు గుర్తించారు. పైరసీ ద్వారా వచ్చిన ఆదాయం, వివిధ వనరుల నుంచి వచ్చిన డబ్బులు, బెట్టింగ్ యాప్‌లతో ఉన్న సంబంధాలపై కూడా పోలీసులు దర్యాప్తు చేపట్టారు. ఐబొమ్మ వెబ్‌సైట్‌లో సినిమాలతో పాటు బెట్టింగ్ యాప్‌ల ప్రకటనలు కూడా కనిపించిన నేపథ్యంలో ఆర్థిక లావాదేవీలను లోతుగా పరిశీలించారు. రవితో కలిసి పనిచేసిన స్నేహితులు, సహకరించిన వ్యక్తులను కూడా పోలీసులు గుర్తించి విచారించారు. వెబ్‌సైట్ నిర్వహణ, సినిమాల అప్‌లోడ్, థంబ్‌నెయిల్స్ తయారీ, ఇతర సాంకేతిక కార్యకలాపాల్లో పలువురు భాగస్వామ్యం ఉన్నట్లు ఆధారాలు సేకరించారు. విదేశాల నుంచి కూడా ఈ వెబ్‌సైట్ నిర్వహించినట్లు పోలీసులు గుర్తించిన నేపథ్యంలో మరోసారి దేశం విడిచి వెళ్లే అవకాశాన్ని నివారించేందుకు కోర్టు కఠిన నిబంధనలు విధించింది. ప్రస్తుతం కేసు దర్యాప్తు కొనసాగుతుండగా, రవి క్రమం తప్పకుండా పోలీసుల ఎదుట హాజరవుతూ విచారణకు సహకరించాల్సి ఉంటుంది. అతని కార్యకలాపాలు, డిజిటల్ వినియోగంపై పోలీసులు నిరంతర నిఘా కొనసాగించనున్నారు. పైరసీ కార్యకలాపాలకు అడ్డుకట్ట వేసేందుకు కోర్టు విధించిన ఇంటర్నెట్ వినియోగ ఆంక్షలు ఈ కేసులో కీలకంగా మారాయి.
