కాళేశ్వరం ప్రాజెక్టుపై రాజకీయ కక్ష సాధింపు
హైకోర్టు తీర్పు అత్యంత హర్షణీయం
వ్యవసాయ రంగాన్ని బలోపేతం చేసిన ప్రాజెక్టు
బీఆర్ఎస్‌ మాజీ లోక్‌సభ పక్ష నేత నామ నాగేశ్వరరావు
కాకతీయ, ఖమ్మం : కాళేశ్వరం ప్రాజెక్టు విషయంలో ప్రభుత్వం రాజకీయ కక్షసాధింపులకు పాల్పడటం తగదని బీఆర్ఎస్‌ మాజీ లోక్‌సభ పక్ష నేత, ఖమ్మం మాజీ ఎంపీ నామ నాగేశ్వరరావు పేర్కొన్నారు. కాళేశ్వరం కమిషన్‌పై తెలంగాణ హైకోర్టు వెలువరించిన తీర్పును ఆయన సాదరంగా స్వాగతించారు. బుధవారం ఖమ్మంలో ఏర్పాటు చేసిన సమావేశంలో ఆయన మాట్లాడారు. జస్టిస్ పీసీ ఘోష్ కమిషన్ నివేదిక ఆధారంగా ఎలాంటి చర్యలు చేపట్టవద్దని హైకోర్టు ఆదేశించడం శుభపరిణామమని నామ నాగేశ్వరరావు అన్నారు. కమిషన్ ఏర్పాటులో నిబంధనలు పాటించలేదని న్యాయస్థానం స్పష్టం చేసిందని తెలిపారు. కాళేశ్వరం ప్రపంచంలోనే అతిపెద్ద ఎత్తిపోతల పథకమని కొనియాడారు. మాజీ ముఖ్యమంత్రి కేసీఆర్, మాజీ మంత్రి హరీష్ రావులకు నోటీసులు ఇవ్వడం రాజకీయ కక్షేనని విమర్శించారు. తెలంగాణ రాష్ట్రానికి కాళేశ్వరం ఒక జీవనాడి అని అభివర్ణించారు. ఈ ప్రాజెక్టు ద్వారా బీడు భూములకు సాగునీరు అందుతోందని వివరించారు. ప్రజల దాహార్తిని తీర్చడంలో ఈ పథకం కీలక పాత్ర పోషించిందని చెప్పారు. కేసీఆర్ దూరదృష్టితోనే ఈ అద్భుతం సాధ్యమైందని స్పష్టం చేశారు.
జాతీయ హోదా కల్పించాలి
కేంద్ర ప్రభుత్వం నుంచి అన్ని అనుమతులు సాధించి ఈ ప్రాజెక్టు రికార్డు సృష్టించిందని నామ నాగేశ్వరరావు గుర్తుచేశారు. ఈ పథకం విశిష్టతను తాను 17వ లోక్‌సభలో పలుమార్లు వివరించానని చెప్పారు. దీనికి జాతీయ హోదా కల్పించి నిధులు ఇవ్వాలని కోరినట్లు తెలిపారు. పార్లమెంటులో పార్టీలకు అతీతంగా అందరూ కాళేశ్వరాన్ని ప్రశంసించారని వెల్లడించారు. అటువంటి ప్రాజెక్టుపై రాజకీయం చేయడం ఏమాత్రం సరికాదని హితవు పలికారు. మల్టీ స్టేజ్ లిఫ్ట్ ఇరిగేషన్ ద్వారా లక్షల ఎకరాల ఆయకట్టుకు నీరు అందుతోందని వివరించారు. పరిశ్రమలకు సైతం అవసరమైన జలాలను ఈ ప్రాజెక్టు అందిస్తోందని పేర్కొన్నారు. భూగర్భ జలాలు పెరగడం ఈ పథకం సాధించిన మరో విజయమని చెప్పారు. కేసీఆర్ హయాంలో జరిగిన అభివృద్ధిని అడ్డుకునే కుట్రలను ప్రజలు సహించరని ఆయన హెచ్చరించారు. రైతుల కష్టాలను తీర్చిన ప్రాజెక్టుపై విషప్రచారం చేయడం మానుకోవాలని సూచించారు. తాజా తీర్పుతోనైనా ప్రభుత్వ ధోరణి మారాలని ఆయన ఆకాంక్షించారు. ఈ సమావేశంలో బీఆర్ఎస్‌ నాయకులు మరియు కార్యకర్తలు పాల్గొన్నారు.
