అంగన్వాడీ సరుకులు ఇక ‘ఇంటికే’
మే 31 వరకు ఇంటి వద్దకే పోషకాహార పంపిణీ
44 డిగ్రీల ఎండల దృష్ట్యా సర్కారు కీలక నిర్ణయం!
గర్భిణులు, బాలింతలు, చిన్నారులకు భారీ ఊరట
వేలాది కుటుంబాలకు లబ్ధి.. జిల్లాలోని 777 కేంద్రాలు
పర్యవేక్షణకు ఐసీడీఎస్ అధికారులతో మానిటరింగ్ వ్యవస్థ
కాకతీయ, కరీంనగర్ : ఉమ్మడి కరీంనగర్ జిల్లాలో నిప్పులు చెరుగుతున్న భానుడి భగభగలకు చిన్నారులు, గర్భిణులు అల్లాడిపోతుండటంతో రాష్ట్ర ప్రభుత్వం మానవీయ కోణంలో కీలక నిర్ణయం తీసుకుంది. అంగన్వాడీ కేంద్రాలకు వెళ్లాల్సిన అవసరం లేకుండానే, పోషకాహార సరుకులను నేరుగా లబ్ధిదారుల ఇళ్లకే చేరవేయాలని ఆదేశించింది. మే నెలలో ఉష్ణోగ్రతలు 44 డిగ్రీలు దాటుతున్న నేపథ్యంలో, ఎండల తీవ్రత నుంచి గర్భిణులు, బాలింతలు మరియు చిన్నారులను రక్షించడమే లక్ష్యంగా ఈ ‘హోమ్ డెలివరీ’ ప్రక్రియకు శ్రీకారం చుట్టింది.
ఎండల నుంచి ఆరోగ్య రక్షణే లక్ష్యం
ప్రస్తుతం జిల్లాలో భానుడి సెగలు తీవ్రరూపం దాల్చాయి. ఉదయం 10 గంటలకే బయటకు రావాలంటే ప్రజలు గజగజలాడుతున్నారు. ఇలాంటి పరిస్థితుల్లో గర్భిణులు, పసిపిల్లలను అంగన్వాడీ కేంద్రాలకు తీసుకురావడం వల్ల వారి ఆరోగ్యం దెబ్బతినే ప్రమాదం ఉందని అధికారులు గుర్తించారు. ఈ నెల 1వ తేదీ నుంచి అంగన్వాడీలకు వేసవి సెలవులు ప్రకటించినప్పటికీ, లబ్ధిదారులకు అందాల్సిన పోషకాహారం ఆగకూడదనే ఉద్దేశంతో ఈ ప్రత్యామ్నాయ పంపిణీ విధానాన్ని అమలు చేస్తున్నారు. అంగన్వాడీ కార్యకర్తలు, ఆయాలు క్షేత్రస్థాయిలో తిరిగి సరుకులను పంపిణీ చేస్తున్నారు.
వేలాది మందికి పోషకాహార భరోసా
కరీంనగర్ జిల్లాలోని నాలుగు ఐసీడీఎస్ ప్రాజెక్టుల పరిధిలో ఉన్న 777 అంగన్వాడీ కేంద్రాల ద్వారా పెద్ద ఎత్తున పోషకాహారం అందుతోంది. సుమారు 4,286 మంది గర్భిణులు, 4 వేల మందికి పైగా బాలింతలు, దాదాపు 10 వేల మంది చిన్నారులకు ఈ పథకం ద్వారా లబ్ధి చేకూరుతోంది. పిల్లల ఎదుగుదలకు అవసరమైన బాలమృతం ప్యాకెట్లు, కోడిగుడ్లు, పాలు వంటి పోషక పదార్థాలను నేరుగా ఇళ్లకు అందజేస్తున్నారు. మే 31 వరకు ఈ విధానం నిరంతరాయంగా కొనసాగనుంది.
పర్యవేక్షణలో పంపిణీ.. లబ్ధిదారుల హర్షం
సరుకుల పంపిణీలో ఎక్కడా జాప్యం జరగకుండా, అర్హులైన ప్రతి ఒక్కరికీ సరుకులు అందుతున్నాయా లేదా అన్నది పర్యవేక్షించేందుకు అధికారులు ప్రత్యేక మానిటరింగ్ వ్యవస్థను ఏర్పాటు చేశారు. ఈ నిర్ణయంపై లబ్ధిదారులు సంతోషం వ్యక్తం చేస్తున్నారు. “ఈ ఎండల్లో చిన్నారులను ఎత్తుకుని కేంద్రానికి వెళ్లడం నరకప్రాయంగా ఉండేదని, ఇప్పుడు ఇంటికే సరుకులు రావడం పెద్ద ఊరటనిస్తోంది” అని గర్భిణులు, బాలింతలు పేర్కొంటున్నారు. పరిస్థితిని బట్టి అవసరమైతే జూన్ మొదటి వారంలో కూడా ఈ విధానాన్ని కొనసాగించే దిశగా అధికారులు ఆలోచన చేస్తున్నారు. ప్రభుత్వం తీసుకున్న ఈ నిర్ణయం ఎండకాలంలో వేలాది కుటుంబాలకు కొండంత అండగా నిలిచింది.
