అమరవీరుల త్యాగాలు వెలకట్టలేనివి
కానిస్టేబుల్‌ గుజ్జెటి మహేశ్‌కు ఎమ్మెల్యే, సీపీ నివాళి
అమరుడి కుటుంబానికి సన్మానం.. విద్యార్థులకు ఓపెన్‌ హౌస్‌
ఎమ్మెల్యే మేడిపల్లి సత్యం, సీపీ గౌష్‌ ఆలం
కాకతీయ, కరీంనగర్ : దేశ అంతర్గత భద్రత, శాంతిభద్రతల పరిరక్షణ కోసం ప్రాణాలర్పించిన పోలీసు అమరవీరుల త్యాగాలు వెలకట్టలేనివని చొప్పదండి ఎమ్మెల్యే మేడిపల్లి సత్యం, కరీంనగర్ పోలీస్‌ కమిషనర్‌ గౌష్‌ ఆలం అన్నారు. పోలీసు అమరవీరుల సంస్మరణ వారోత్సవాల్లో భాగంగా సోమవారం గంగాధర పోలీస్‌ స్టేషన్‌ ఆవరణలో అమరవీరుడు, కానిస్టేబుల్‌ గుజ్జెటి మహేశ్‌ విగ్రహానికి పూలమాలలు వేసి నివాళులర్పించారు. 2008లో బలిమెల ఘటనలో విధి నిర్వహణలో ప్రాణాలు కోల్పోయిన మహేశ్‌ సేవలను స్మరించుకున్నారు. అనంతరం మహేశ్‌ కుటుంబ సభ్యులను శాలువాతో సన్మానించి యోగక్షేమాలు అడిగి తెలుసుకున్నారు. అమరవీరుల కుటుంబాలకు పోలీసు శాఖ ఎల్లప్పుడూ అండగా ఉంటుందని సీపీ గౌష్‌ ఆలం తెలిపారు. పోలీసు ఉద్యోగం క్రమశిక్షణ, త్యాగనిరతితో కూడుకున్నదని ఎమ్మెల్యే మేడిపల్లి సత్యం పేర్కొన్నారు. విద్యార్థులు చిన్ననాటి నుంచే లక్ష్యాన్ని నిర్దేశించుకుని కష్టపడి చదివి ఉన్నత శిఖరాలకు చేరుకోవాలని సూచించారు. ఈ సందర్భంగా పోలీస్‌ స్టేషన్‌ ఆవరణలో నిర్వహించిన ఓపెన్‌ హౌస్‌లో విద్యార్థులకు ఆయుధాలు, పోలీసు విధులు, శాంతిభద్రతల పరిరక్షణపై అవగాహన కల్పించారు. కార్యక్రమంలో కరీంనగర్ రూరల్‌ ఏసీపీ విజయకుమార్‌, చొప్పదండి ఇన్‌స్పెక్టర్‌ ప్రదీప్‌, ఎస్‌ఐలు వంశీకృష్ణ, రాజ్‌కుమార్‌, రాజుతో పాటు పోలీసు సిబ్బంది, అమరుడి కుటుంబ సభ్యులు, స్థానిక ప్రజాప్రతినిధులు, ఉపాధ్యాయులు, విద్యార్థులు పాల్గొన్నారు.
