సాంకేతికతతోనే డ్రగ్స్ ముప్పును అరికట్టగలం
ఏఐని వినియోగించుకుంటూ అక్రమ రవాణాపై ఉక్కుపాదం మోపాలి
యువత భవిష్యత్తును కాపాడే బాధ్యత ఎక్సైజ్ శాఖదే
అంతర్జాతీయ స్థాయి నిఘా వ్యవస్థలను తీసుకువస్తాం
నేరగాళ్లు ఎంతటివారైనా చట్టం ముందు మోకరిల్లాలి
ఎక్సైజ్ శాఖ మంత్రి జూపల్లి కృష్ణారావు
కాకతీయ, హైదరాబాద్ : డ్రగ్స్ మరియు గంజాయి నియంత్రణకు అత్యాధునిక సాంకేతికతను ఆయుధంగా ఉపయోగించుకోవాలని ఎక్సైజ్ శాఖ మంత్రి జూపల్లి కృష్ణారావు స్పష్టం చేశారు. అక్రమ రవాణా చేసే ముఠాల నెట్వర్క్లను ఛేదించేందుకు డేటా అనలిటిక్స్, కృత్రిమ మేధస్సు, డ్రోన్ సర్వైలెన్స్ వంటి ఆధునిక నిఘా వ్యవస్థలను అనుసంధానం చేయాలని ఆయన పిలుపునిచ్చారు. బండ్లగూడ జాగీర్లోని ఎక్సైజ్ అకాడమీలో గురువారం జరిగిన అసిస్టెంట్ ఎక్సైజ్ సూపరింటెండెంట్లు, ఎక్సైజ్ సబ్ ఇన్స్పెక్టర్ల దీక్షాంత్ పరేడ్లో ఆయన ముఖ్య అతిథిగా పాల్గొన్నారు. శిక్షణ పూర్తి చేసుకున్న 117 మంది కొత్త అధికారులను ఉద్దేశించి మంత్రి ప్రసంగించారు. ఒకప్పుడు నాటుసారా, గుడుంబా, కల్తీ కల్లు వంటివి ప్రధాన సవాళ్లుగా ఉండేవి. కానీ ప్రస్తుత కాలంలో గంజాయి, సింథటిక్ డ్రగ్స్, ఆన్లైన్ నార్కోటిక్ నెట్వర్క్లు కొత్త సవాళ్లుగా మారాయి. నేరగాళ్లు సాంకేతికతను వాడుకుంటూ అక్రమ వ్యాపారాలను సాగిస్తున్నారు. వారిని ఎదుర్కొనేందుకు అధికారులు కూడా అదే స్థాయిలో ఆధునిక పరిజ్ఞానాన్ని అందిపుచ్చుకోవాలి. డ్రోన్ల ద్వారా గంజాయి సాగును గుర్తించడం, మొబైల్ అనువర్తనాలు, గ్లోబల్ పొజిషనింగ్ సిస్టమ్ ట్రాకింగ్తో రవాణాను పర్యవేక్షించడం, సోషల్ మీడియా ఇంటెలిజెన్స్తో ముఠాలను ముందుగానే పసిగట్టడం సాధ్యమవుతుంది. రాష్ట్రంలో అంతర్జాతీయ స్థాయి నిఘా విధానాలను మరింత విస్తృతంగా అమలు చేసే దిశగా చర్యలు చేపడుతున్నాం.
సామాజిక విపత్తుగా డ్రగ్స్
డ్రగ్స్ అనేవి కేవలం చట్ట ఉల్లంఘనలు మాత్రమే కాదు, కుటుంబాలను విచ్ఛిన్నం చేసి యువత భవిష్యత్తును నాశనం చేసే సామాజిక విపత్తులు. అధికారులు స్వాధీనం చేసుకునే ప్రతి డ్రగ్స్ ప్యాకెట్ వెనుక ఒక యువకుడి జీవితం ఉంటుంది. అధికారుల విధులు కేసుల నమోదు వద్ద ముగియవు, సమాజాన్ని రక్షించడంలోనే నిజమైన కర్తవ్యం ప్రారంభమవుతుంది. ఎక్సైజ్ శాఖ అనేది కేవలం ప్రభుత్వానికి ఆదాయం సమకూర్చే విభాగం మాత్రమే కాదు, ప్రజల ఆరోగ్యాన్ని కాపాడే కీలకమైన శాఖ. యూనిఫాం అనేది కేవలం ఒక హోదా కాదు, కోట్లాది మంది ప్రజల నమ్మకానికి ప్రతీక అని గుర్తించాలి. గంజాయి, మద్యం అక్రమ రవాణా చేసే ముఠాలపై నిర్దాక్షిణ్యంగా వ్యవహరించాలి. రాష్ట్రంలోకి మాదకద్రవ్యాలు ప్రవేశించకుండా అప్రమత్తంగా ఉండాలి. అక్రమార్కులు ఎంతటివారైనా, వారికి ఎలాంటి అండదండలు ఉన్నా చట్టం ముందు మోకరిల్లేలా కఠినంగా వ్యవహరించాలి. క్రమశిక్షణ, నిజాయితీ, పారదర్శకత, ప్రజాసేవా దృక్పథమే అధికారులకు అసలైన గుర్తింపు. నిజామాబాద్లో గంజాయి అక్రమ రవాణాను అడ్డుకునే క్రమంలో ప్రాణత్యాగం చేసిన కానిస్టేబుల్ సౌమ్య ధైర్యసాహసాలను కొత్త అధికారులు స్ఫూర్తిగా తీసుకోవాలి. ఈ క్రమశిక్షణ, నిజాయితీతోనే తెలంగాణను సురక్షితమైన, ఆరోగ్యకరమైన రాష్ట్రంగా తీర్చిదిద్దవచ్చు. ఈ కార్యక్రమంలో అడిషనల్ కమిషనర్ ఖురేషీ, అకాడమీ డైరెక్టర్ సురేష్, జాయింట్ కమిషనర్ అంజన్రావు, జాయింట్ డైరెక్టర్ శశిధర్రెడ్డి, చీఫ్ డ్రిల్ ఇన్స్పెక్టర్ రంగారెడ్డి, ఇతర ఉన్నతాధికారులు, శిక్షణార్థుల కుటుంబ సభ్యులు పాల్గొన్నారు. శిక్షణలో అత్యుత్తమ ప్రతిభ కనబరిచిన అధికారులకు మంత్రి పురస్కారాలు అందజేశారు. మొత్తం 117 మంది అధికారులలో 28 మంది అసిస్టెంట్ ఎక్సైజ్ సూపరింటెండెంట్లు, 89 మంది ప్రొహిబిషన్ అండ్ ఎక్సైజ్ సబ్ ఇన్స్పెక్టర్లు ఉండగా, వీరిలో 33 మంది మహిళా అధికారులు ఉన్నారు. ఆరు నెలల కఠోర సంస్థాగత శిక్షణను వీరు విజయవంతంగా పూర్తి చేసుకున్నారు.
