రిమ్స్ పిల్లల వార్డులో పేలిన ఏసీ
ఎస్ఎన్సీయూలో ఏసీ నుంచి ఒక్కసారిగా పొగలు
ప్రమాద సమయంలో 27 మంది నవజాత శిశువులు
వెంటిలేటర్పై ఉన్న ప్రీటర్మ్ బేబీ మృతి
అద్దాలు పగలగొట్టి పసికందులను రక్షించిన సిబ్బంది
ప్రైవేట్ ఆస్పత్రులకు హుటాహుటిన తరలింపు
ఘటనాస్థలికి కలెక్టర్ రాజర్షి, ఎస్పీ.. సహాయక చర్యల పర్యవేక్షణ
కాకతీయ, ఆదిలాబాద్ : నిత్యం రోగులతో రద్దీగా ఉండే ఆదిలాబాద్ రిమ్స్ ఆస్పత్రిలోని నవజాత శిశువుల ప్రత్యేక సంరక్షణ విభాగం(ఎస్ఎన్సీయూ)లో చోటుచేసుకున్న అగ్నిప్రమాదం కలకలం రేపింది. ప్రమాద సమయంలో వార్డులో 27 మంది నవజాత శిశువులు ఉండగా.. ఒక్కసారిగా దట్టమైన పొగ అలుముకోవడంతో సిబ్బంది అప్రమత్తమయ్యారు. ఏసీకి సంబంధించిన సమస్యతో పొగలు వ్యాపించినట్లు ప్రాథమికంగా అధికారులు చెబుతున్నప్పటికీ.. అసలు కారణం ఏమిటనేది సమగ్ర దర్యాప్తు తర్వాతే తేలుతుందని స్పష్టం చేశారు. ప్రమాదం జరిగిన వెంటనే రిమ్స్ డైరెక్టర్ జైసింగ్, వైద్య సిబ్బంది స్పందించడంతోపాటు.. అక్కడే ఉన్న ప్రైవేట్ అంబులెన్స్ డ్రైవర్లు, రోగి సహాయకులు కూడా రక్షణ చర్యల్లో పాల్గొన్నారు. కిటికీల అద్దాలు పగలగొట్టి మరీ శిశువులను బయటకు తీసుకురావడంతో పెను ప్రమాదం తప్పింది.
క్షణాల్లో దట్టమైన పొగ
ఎస్ఎన్సీయూలో ఏసీ నుంచి పొగలు రావడంతో ఒక్కసారిగా పరిస్థితి మారిపోయింది. విద్యుత్ సరఫరాకు అంతరాయం ఏర్పడి వార్డులో చీకటి అలుముకోవడంతోపాటు పొగ విపరీతంగా వ్యాపించింది. వెంటిలేటర్లు, ఇతర వైద్య పరికరాల సహాయంతో చికిత్స పొందుతున్న పసికందులను బయటకు తరలించాల్సిన అత్యవసర పరిస్థితి ఏర్పడింది. విషయం గుర్తించిన సిబ్బంది ఆలస్యం చేయకుండా రక్షణ చర్యలు ప్రారంభించారు. ప్రమాద సమయంలో ఎస్ఎన్సీయూలో ఓ ప్రీటర్మ్ బేబీ వెంటిలేటర్పై చికిత్స పొందుతోంది. అధికారుల ప్రకారం.. ఘటనకు ముందే ఆ శిశువుకు డెత్ డిక్లరేషన్ జరిగినట్లు తెలిపారు. అందువల్ల ఆ శిశువు మృతికి అగ్నిప్రమాదమే కారణమని ఇప్పుడే నిర్ధారించలేమని స్పష్టం చేశారు. ఘటన సమయంలో మరికొందరు శిశువులు కూడా వెంటిలేటర్ సపోర్ట్పై ఉన్నారు. వారిని అత్యవసరంగా సురక్షిత ప్రాంతాలకు తరలించి అనంతరం ప్రైవేట్ ఆస్పత్రులకు షిఫ్ట్ చేశారు.
అద్దాలు పగలగొట్టి పసిప్రాణులను రక్షించిన సిబ్బంది
పొగ దట్టంగా అలుముకోవడంతో సాధారణ మార్గంలో శిశువులను బయటకు తీసుకురావడం కష్టంగా మారింది. దీంతో కిటికీల అద్దాలు పగలగొట్టి లోపలికి వెళ్లేందుకు, పిల్లలను బయటకు తీసుకొచ్చేందుకు మార్గం సుగమం చేశారు. రిమ్స్ డైరెక్టర్ జైసింగ్తో పాటు సిబ్బంది అప్రమత్తంగా వ్యవహరించారు. అక్కడే ఉన్న ప్రైవేట్ అంబులెన్స్ డ్రైవర్లు, రోగి సహాయకులు సైతం పిల్లలను కాపాడేందుకు తమవంతు ప్రయత్నాలు చేశారు. వెంటిలేటర్పై ఉన్న శిశువులను వైద్య పరికరాలతో సహా జాగ్రత్తగా తరలించారు.
ఇతర వార్డులకు వ్యాపించకుండా మంటల అదుపు
ఎస్ఎన్సీయూలో పొగలు వ్యాపించడంతో అగ్నిమాపక సిబ్బంది వెంటనే రంగంలోకి దిగారు. మంటలు ఇతర వార్డులకు వ్యాపించకుండా చర్యలు చేపట్టారు. పొగను తొలగిస్తూ పరిస్థితిని అదుపులోకి తీసుకొచ్చారు. దీంతో ప్రమాదం ఇతర విభాగాలకు విస్తరించకుండా నిలువరించగలిగారు. అగ్నిమాపక, పోలీసు, వైద్య సిబ్బంది సమన్వయంతో రక్షణ చర్యలు కొనసాగాయి. ప్రమాదం అనంతరం నవజాత శిశువులను తక్షణమే సమీపంలోని ప్రైవేట్ ఆస్పత్రులకు తరలించారు. వెంటిలేటర్ సపోర్ట్ అవసరమైన శిశువులను ప్రత్యేక జాగ్రత్తలతో తరలించి వైద్యుల పర్యవేక్షణలో ఉంచారు. అక్కడ పీడియాట్రిషియన్లు ప్రతి నిమిషం వారి ఆరోగ్య పరిస్థితిని పరిశీలిస్తున్నట్లు అధికారులు తెలిపారు. ప్రమాదం తర్వాత శిశువులకు ఎలాంటి ఇబ్బందులు తలెత్తకుండా వైద్య బృందాలు నిరంతరం పర్యవేక్షిస్తున్నాయి.
కలెక్టర్, ఎస్పీ పర్యవేక్షణ
సమాచారం అందుకున్న ఆదిలాబాద్ కలెక్టర్ రాజర్షి షా, ఎస్పీ అఖిల్ మహాజన్ ఘటనాస్థలికి చేరుకున్నారు. సహాయక చర్యలను స్వయంగా పర్యవేక్షించారు. నవజాత శిశువులను ఎలాంటి ఆలస్యం లేకుండా ఇతర ఆస్పత్రులకు తరలించాలని అధికారులకు సూచించారు. ఫైర్ డిపార్ట్మెంట్, పోలీసు విభాగం, వైద్య సిబ్బంది సమన్వయంతో చేపట్టిన చర్యలను పరిశీలించారు. ప్రమాదానికి ఎయిర్ కండిషనర్ కారణమై ఉండొచ్చన్న సమాచారం ప్రాథమికంగా మాత్రమే ఉందని అధికారులు స్పష్టం చేశారు. ఏసీ కారణంగానే మంటలు చెలరేగాయా? విద్యుత్ వ్యవస్థలో లోపమా? లేక మరేదైనా కారణమా? అనేది పూర్తిస్థాయి దర్యాప్తు తర్వాతే తేలుతుందని తెలిపారు. సంఘటనపై సమగ్ర విచారణ చేపట్టి అసలు కారణాలను నిర్ధారించిన తర్వాతే స్పష్టమైన సమాచారం వెల్లడిస్తామని పేర్కొన్నారు. ఈ ఘటనతో రిమ్స్లోని ఎస్ఎన్సీయూ భద్రతా ఏర్పాట్లు, విద్యుత్ వ్యవస్థ, అగ్నిమాపక పరికరాల పనితీరు, అత్యవసర తరలింపు మార్గాలపై కూడా దృష్టి సారించాల్సిన అవసరం ఏర్పడింది. ముఖ్యంగా వెంటిలేటర్ వంటి ప్రాణాధార పరికరాలపై చికిత్స పొందుతున్న నవజాత శిశువులు ఉన్న విభాగాల్లో అత్యవసర పరిస్థితులను ఎదుర్కొనే ఏర్పాట్లు ఎప్పటికప్పుడు సిద్ధంగా ఉంచాల్సిన అవసరాన్ని ఈ ఘటన మరోసారి గుర్తుచేసింది.
