16 ఏళ్ల తర్వాత తెరుచుకున్న బడిలో విద్యార్థులకు చేయూత
సొంత నిధులతో రూ.10 వేల విలువైన విద్యాసామగ్రి అందజేత
పేద విద్యార్థులకు అండగా నిలిచిన తహసీల్దార్
గీసుకొండ మండల మెజిస్ట్రేట్ తహసీల్దార్ ఎం.డి. రియాజుద్దీన్
కాకతీయ, గీసుకొండ : 16 ఏళ్ల విరామం అనంతరం పునఃప్రారంభమైన ప్రభుత్వ పాఠశాలలో చదువుతున్న విద్యార్థులకు గీసుకొండ మండల మెజిస్ట్రేట్, తహసీల్దార్ ఎం.డి. రియాజుద్దీన్ తనవంతు సహాయం అందించారు. కొమ్మాల రెవెన్యూ పరిధిలోని సూర్యతండా ప్రభుత్వ పాఠశాలను ఇటీవల సందర్శించిన ఆయన.. పేద కుటుంబాలకు చెందిన విద్యార్థుల వద్ద పాఠశాల బ్యాగులు, నోట్బుక్స్, కంపాస్ బాక్సులు తదితర విద్యాసామగ్రి లేకపోవడాన్ని గమనించారు. దీంతో స్పందించిన తహసీల్దార్ తన సొంత నిధులతో సుమారు రూ.10 వేల వరకు వెచ్చించి విద్యార్థులకు అవసరమైన బ్యాగులు, నోట్బుక్స్, కంపాస్ బాక్సులు తదితర సామగ్రిని కొనుగోలు చేశారు. సోమవారం పాఠశాలలో నిర్వహించిన కార్యక్రమంలో వాటిని విద్యార్థులకు అందజేశారు. ఈ సందర్భంగా ఆయన మాట్లాడుతూ విద్యార్థులు ఎలాంటి ఇబ్బందులు లేకుండా చదువుకునేందుకు అవసరమైన సహకారం అందించడం ప్రతి ఒక్కరి బాధ్యత అన్నారు. 16 ఏళ్ల తర్వాత పునఃప్రారంభమైన పాఠశాలలో చదువుకుంటున్న విద్యార్థులు ఈ అవకాశాన్ని సద్వినియోగం చేసుకుని కష్టపడి చదివి ఉన్నత శిఖరాలను అధిరోహించాలని ఆకాంక్షించారు. తహసీల్దార్ స్పందించి విద్యాసామగ్రి అందించడంపై తల్లిదండ్రులు, గ్రామస్తులు హర్షం వ్యక్తం చేశారు. కార్యక్రమంలో గ్రామ పాలనాధికారి రవికుమార్, ఉపాధ్యాయులు సుధారాణి, రజినీకాంత్, గ్రామస్తులు, విద్యార్థినీ విద్యార్థులు పాల్గొన్నారు.
