ఫార్మర్ రిజిస్ట్రీలో ప్రతి రైతు నమోదు కావాలి : ఏఈఓ సంపత్
కాకతీయ,జమ్మికుంట:వ్యవసాయ పాస్బుక్ ఉన్న ప్రతి రైతు ఫార్మర్ రిజిస్ట్రీలో తప్పనిసరిగా నమోదు చేసుకోవాలని ఏఈఓ సంపత్ సూచించారు. మంగళవారం జమ్మికుంట మండలం వావిలాల రైతు వేదికలో ఫార్మర్ రిజిస్ట్రీ నమోదు కార్యక్రమం నిర్వహించారు. ఈ సందర్భంగా ఏఈఓ సంపత్ మాట్లాడుతూ.. 2026 జనవరి 1 నుంచి ఆగస్టు 13 వరకు కొత్త పట్టాదారు పాస్బుక్లు పొందినప్పటికీ ఫార్మర్ రిజిస్ట్రీలో నమోదు కాని రైతులు వెంటనే నమోదు చేసుకోవాలని తెలిపారు. ఎఫ్ఎఫ్ఎస్ ద్వారా యూరియా బుకింగ్, ప్రభుత్వ మద్దతు ధరకు పంటల విక్రయం, బ్యాంకు రుణాలు, పీఎం కిసాన్ పథకం ప్రయోజనాలు, కేంద్ర, రాష్ట్ర ప్రభుత్వాల వివిధ సంక్షేమ పథకాలు పొందేందుకు ఫార్మర్ రిజిస్ట్రీ నమోదు అవసరమని పేర్కొన్నారు. రైతులందరూ ఈ అవకాశాన్ని సద్వినియోగం చేసుకుని ఫార్మర్ రిజిస్ట్రీలో తమ వివరాలను నమోదు చేసుకోవాలని కోరారు. కార్యక్రమంలో వావిలాల, నగరం, నాగారం, పాపక్కపల్లి గ్రామాలకు చెందిన రైతులు పాల్గొన్నారు.
