రామప్ప బొగ్గు గనిపై ఎన్‌జీటీ సుమోటో కేసు!
వారసత్వ కట్టడం సమీపంలో గని ప్రతిపాదనపై విచారణకు నిర్ణయం
సరస్సుకు 300 మీటర్ల దూరంలో తవ్వకాలపై ఆందోళన
800 ఏళ్ల ఆలయ పునాదులకు ముప్పు వాటిల్లే అవకాశం
భూగర్భ జలాల ప్రవాహంపై ప్రభావాన్ని పరిశీలించిన ట్రిబ్యునల్‌
ఐదు ప్రభుత్వ విభాగాలకు నోటీసులు.. అఫిడవిట్లు దాఖలు చేయాలని ఆదేశం
కేసును చెన్నై ధర్మాసనానికి బదిలీ చేసిన ఎన్‌జీటీ
కాకతీయ, తెలంగాణ బ్యూరో : ప్రపంచ వారసత్వ సంపదగా యునెస్కో గుర్తింపు పొందిన రామప్ప దేవాలయం సమీపంలో ప్రతిపాదించిన బొగ్గు గని ప్రాజెక్టుపై జాతీయ హరిత ట్రిబ్యునల్‌ (ఎన్‌జీటీ) సుమోటోగా కేసు స్వీకరించింది. చారిత్రక కట్టడం, రామప్ప సరస్సు పర్యావరణానికి ముప్పు వాటిల్లే అవకాశాలపై ప్రచురితమైన వార్తా కథనాన్ని స్వయంగా పరిగణనలోకి తీసుకుని విచారణకు నిర్ణయించింది. సింగరేణి కాలరీస్‌ కంపెనీ లిమిటెడ్‌ ప్రతిపాదించిన బొగ్గు గని సరస్సుకు కేవలం 300 మీటర్ల దూరంలో ఉండటం, తవ్వకాల వల్ల భూగర్భ జలాల ప్రవాహం ప్రభావితమయ్యే అవకాశాలు, దాదాపు 800 ఏళ్ల చరిత్ర కలిగిన రామప్ప ఆలయ పునాదుల భద్రతకు సంబంధించిన అంశాలను ట్రిబ్యునల్‌ ప్రస్తావించింది. ఈ వ్యవహారంలో పర్యావరణ పరిరక్షణ చట్టం–1986 ఉల్లంఘనలకు సంబంధించిన కీలక ప్రశ్నలు తలెత్తుతున్నాయని పేర్కొంటూ ఐదు ప్రభుత్వ విభాగాలను ప్రతివాదులుగా చేర్చింది. ఆయా శాఖలు తమ వివరణలను అఫిడవిట్ల రూపంలో సమర్పించాలని ఆదేశించింది.
వార్తా కథనంతో కదిలిన ఎన్‌జీటీ
అక్టోబరు 5న ప్రచురితమైన ‘రామప్ప దేవాలయం సమీపంలో బొగ్గు గనితో వారసత్వ కట్టడం, సరస్సుకు ముప్పు’ అనే వార్తా కథనాన్ని ఎన్‌జీటీ విచారణకు ఆధారంగా తీసుకుంది. ములుగు జిల్లాలోని కాకతీయ రుద్రేశ్వర ఆలయంగా ప్రసిద్ధి చెందిన రామప్ప దేవాలయం, రామప్ప సరస్సు సమీపంలో సింగరేణి కాలరీస్‌ కంపెనీ లిమిటెడ్‌ బొగ్గు గని ప్రాజెక్టును చేపట్టేందుకు సన్నాహాలు చేస్తున్నట్లు ఆ కథనంలో పేర్కొన్నారు. ఈ ప్రాజెక్టుపై పర్యావరణ పరిరక్షణ కార్యకర్తలు వ్యక్తం చేసిన ఆందోళనలను ట్రిబ్యునల్‌ పరిగణనలోకి తీసుకుంది. పర్యావరణ నిబంధనల అమలు, చారిత్రక వారసత్వ సంపద పరిరక్షణకు సంబంధించిన కీలక అంశాలు ఉన్నాయని గుర్తించి సుమోటోగా కేసు స్వీకరించింది.
సరస్సుకు 300 మీటర్ల దూరంలో గని!
ప్రతిపాదిత బొగ్గు గని రామప్ప సరస్సుకు సుమారు 300 మీటర్ల దూరంలో ఉండటాన్ని ఎన్‌జీటీ ప్రత్యేకంగా ప్రస్తావించింది. సరస్సులో నీటిమట్టం మారితే భూగర్భ జలాల కదలికలు ప్రభావితమయ్యే అవకాశముందని వార్తా కథనంలో పేర్కొన్న అంశాన్ని పరిశీలించింది. భూమి అంతర్భాగంలోని పగుళ్లు, చీలికల ద్వారా భూగర్భ జలాలు ప్రతిపాదిత గని ప్రాంతం వైపు ప్రవహించే ప్రమాదం ఉందన్న ఆందోళనలను నమోదు చేసింది. గని తవ్వకాల నేపథ్యంలో సరస్సు జలవనరులు, భూగర్భ జలాల వ్యవస్థపై పడే ప్రభావం పరిశీలనకు సంబంధించిన అంశంగా మారింది.
800 ఏళ్ల ఆలయ పునాదుల భద్రతపై ప్రశ్నలు
యునెస్కో ప్రపంచ వారసత్వ గుర్తింపు పొందిన రామప్ప దేవాలయం దాదాపు 800 ఏళ్ల చరిత్ర కలిగిన కట్టడం. ప్రత్యేకమైన ఇసుక పెట్టె పునాది విధానంతో నిర్మించిన ఈ ఆలయంలో ఇప్పటికే కొన్ని నిర్మాణపరమైన బలహీనతల సంకేతాలు కనిపిస్తున్నట్లు వార్తా కథనం పేర్కొంది. ఈ నేపథ్యంలో ఆలయ సమీపంలో ప్రతిపాదించిన బొగ్గు గని వల్ల చారిత్రక నిర్మాణంపై ప్రభావం పడే అవకాశాలున్నాయన్న ఆందోళనలను ఎన్‌జీటీ పరిగణనలోకి తీసుకుంది. పర్యావరణ పరిరక్షణ చట్టం–1986లోని నిబంధనల ఉల్లంఘనకు సంబంధించిన అంశాలు ఈ వ్యవహారంలో ఉన్నాయని ట్రిబ్యునల్‌ పేర్కొంది.
ఐదు విభాగాలకు ఎన్‌జీటీ నోటీసులు
ఈ కేసులో తెలంగాణ కాలుష్య నియంత్రణ మండలి, ములుగు జిల్లా కలెక్టర్‌, కేంద్ర కాలుష్య నియంత్రణ మండలి, కేంద్ర పర్యావరణ, అటవీ, వాతావరణ మార్పుల మంత్రిత్వ శాఖ చెన్నై ప్రాంతీయ కార్యాలయం, కేంద్ర భూగర్భ జలాల ప్రాధికార సంస్థలను ఎన్‌జీటీ ప్రతివాదులుగా చేర్చింది. సంబంధిత విభాగాలకు నోటీసులు జారీ చేసి, తమ స్పందనలను అఫిడవిట్ల రూపంలో దాఖలు చేయాలని ఆదేశించింది. ప్రతిపాదిత ప్రాజెక్టు వల్ల పర్యావరణంపై పడే ప్రభావం, సంబంధిత నిబంధనల అమలు అంశాలపై ఆయా విభాగాల వివరణలు విచారణలో కీలకం కానున్నాయి.
చెన్నై ధర్మాసనానికి కేసు బదిలీ
ఎన్‌జీటీ చైర్‌పర్సన్‌ జస్టిస్‌ ప్రకాశ్‌ శ్రీవాస్తవ, నిపుణుల సభ్యుడు డాక్టర్‌ అఫ్రోజ్‌ అహ్మద్‌తో కూడిన ధర్మాసనం ఈ వ్యవహారాన్ని పరిశీలించింది. వార్తా కథనంలో ప్రస్తావించిన అంశాలు పర్యావరణ నిబంధనల అమలు, పరిరక్షణకు సంబంధించిన ముఖ్యమైన ప్రశ్నలను లేవనెత్తుతున్నాయని పేర్కొంది. ఈ కేసు దక్షిణ ప్రాంతీయ ధర్మాసనం పరిధిలోకి వస్తున్నందున ప్రధాన ధర్మాసనం కేసుతోపాటు సంబంధిత అసలు రికార్డులను చెన్నైలోని ఎన్‌జీటీ దక్షిణ ప్రాంతీయ ధర్మాసనానికి బదిలీ చేసింది. తదుపరి విచారణ అక్కడ కొనసాగనుంది.
