బియ్యం ధరలపై అధికారుల కొరడా
ఏటూరునాగారంలో రకాలను బట్టి గరిష్ఠ ధరల ఖరారు
అధిక ధరలకు విక్రయిస్తే దుకాణాలు సీజ్
కాకతీయ, ములుగు: బియ్యం ధరలను ఇష్టారాజ్యంగా పెంచి విక్రయించే వ్యాపారులకు ఏటూరునాగారం తహసీల్దార్ జి. జగదీశ్వర్ హెచ్చరికలు జారీ చేశారు. తెలంగాణ రాష్ట్ర ప్రభుత్వ మార్గదర్శకాలు, పౌరసరఫరాల శాఖ ఆదేశాల మేరకు మండలంలో బియ్యం అధిక ధరల విక్రయాలకు అడ్డుకట్ట వేసేందుకు వివిధ రకాల బియ్యానికి కిలో చొప్పున గరిష్ఠ ధరలను నిర్ణయించారు. బీపీటీ/కేఎన్ఎం రకం బియ్యం కిలో రూ.66, ఆర్ఎన్ఆర్/తెలంగాణ సోనా రకం రూ.74, హెచ్‌ఎంటీ/జేఎస్ఆర్ రకం రూ.79గా ధరలను ఖరారు చేశారు. మండలంలోని రిటైల్, హోల్‌సేల్ బియ్యం వ్యాపారులు ఈ ధరల ప్రకారమే అమ్మకాలు జరపాలని, ప్రజలు కూడా నిర్ణీత ధరలకే బియ్యం కొనుగోలు చేయాలని తహసీల్దార్ కోరారు. ప్రతి దుకాణంలో ధరల పట్టికను వినియోగదారులకు స్పష్టంగా కనిపించేలా తప్పనిసరిగా ప్రదర్శించాలని వ్యాపారులకు సూచించారు. నిర్ణయించిన గరిష్ఠ ధరల కంటే అధికంగా విక్రయాలు జరిపినట్లు గుర్తిస్తే సంబంధిత కిరాణా దుకాణాలను సీజ్ చేయడంతో పాటు బాధ్యులపై క్రిమినల్ చర్యలు తీసుకుంటామని హెచ్చరించారు. బియ్యం అధిక ధరలకు విక్రయిస్తున్నట్లు గుర్తిస్తే ప్రజలు 9440450824 నంబర్‌కు ఫిర్యాదు చేయాలని తహసీల్దార్ సూచించారు. మండల ప్రజలు, బియ్యం వ్యాపారులు ఈ ధరల నియంత్రణ నిబంధనలను తప్పనిసరిగా పాటించాలని స్పష్టం చేశారు.
