కాకతీయ, తెలంగాణ బ్యూరో: నిజామాబాద్ జిల్లా జైలు సూపరింటెండెంట్ చింతల దశరథ్ పై లైంగిక వేధింపుల ఆరోపణలు వెలుగులోకి వచ్చాయి. ఒక ఖైదీ సోదరి ఫిర్యాదు చేయడం ద్వారా ఆయనపై కేసు నమోదు చేసినట్లు సమాచారం. సదరు మహిళ ఫిర్యాదు ప్రకారం, చింతల దశరథ్ ఖైదీలకు ములాకత్ కోసం వచ్చే ఖైదీల భార్యలను, కుటుంబ సభ్యులకు వీడియో కాల్ చేసి, లైంగికంగా వేధించాడని ఆరోపిస్తున్నారు.
ముందుగా చర్లపల్లి జైల్లో డిప్యూటీ సూపరింటెండెంట్గా పని చేస్తున్నప్పుడు కూడా ఇలాంటి ఆరోపణలు వెలువడినట్లు ఫిర్యాదులు ఉన్నాయి. తాజా ఫిర్యాదులను గమనించిన జిల్లా మెజిస్ట్రేట్ వెంటనే విచారణ ప్రారంభించారు. ప్రస్తుతం జిల్లా అధికారులు ఈ కేసును సీరియస్గా తీసుకొని దర్యాప్తు చేస్తున్నారు. ఈ ఘటన జైలులో ఉన్న ఖైదీలు, వారి కుటుంబాల భద్రతపై సానుకూల దృష్టి అవసరమని అధికారులు అన్నారు. నిజామాబాద్ పోలీసులు, జిల్లా మెజిస్ట్రేట్లు సహకారం అందిస్తున్నట్లు సమాచారం. విచారణ పూర్తయ్యేవరకు అవసరమైన చర్యలన్నీ తీసుకుంటామని తెలిపారు.
కాగా ఇదివరకు చింతల దశరథ్ మెదక్ జిల్లా (Medak District) సబ్ జైల్ ఆఫీసర్గా విధులు నిర్వర్తించారు. పదోన్నతిపై ఆయన నిజామాబాద్ జిల్లాకు వచ్చారు. ఇప్పటివరకు ఇన్ఛార్జి సూపరింటెండెంట్గా ఉన్న జైల్ డిప్యూటీ సూపరింటెండెంట్ ఆనంద్ నుంచి ఆయన బాధ్యతలు స్వీకరించారు. ఈ నేపథ్యంలో చింతల దశరథ్ లైంగిక ఆరోపణలు వెలువడటం కలకలం రేపుతోంది.
