ఐడీఓసీలో ఘనంగా వాసవీ మాత జయంతి
చిత్రపటానికి నివాళులర్పించిన కలెక్టరేట్ అధికారులు
వాసవీ మాత బోధనలు సమాజానికి ఆదర్శం : ఏఓ ప్రకాష్
కాకతీయ, పెద్దపల్లి : జిల్లా సమీకృత కార్యాలయాల సముదాయం (ఐడీఓసీ)లో ఆదివారం వాసవీ మాత జయంతి వేడుకలను ఘనంగా నిర్వహించారు. యువజన, పర్యాటక శాఖ ఆధ్వర్యంలో జరిగిన ఈ కార్యక్రమంలో కలెక్టరేట్ పరిపాలన అధికారి (ఏఓ) ప్రకాష్ పాల్గొని, వాసవీ మాత చిత్రపటానికి పూలమాలలు వేసి భక్తిశ్రద్ధలతో నివాళులర్పించారు. ఈ సందర్భంగా ఏఓ ప్రకాష్ మాట్లాడుతూ.. వాసవీ మాత బోధనలు సమాజంలో సమానత్వం, సేవా భావం మరియు సౌభ్రాతృత్వాన్ని పెంపొందించేందుకు ఎంతగానో దోహదపడతాయని పేర్కొన్నారు. ప్రతి ఒక్కరూ ఆమె చూపిన బాటలో నడుస్తూ, మానవతా విలువలను ఆచరణలోకి తీసుకువచ్చి సమాజ అభివృద్ధికి తోడ్పడాలని సూచించారు. మహానీయుల జయంతులను అధికారికంగా నిర్వహించడం వెనుక ఉన్న ప్రధాన ఉద్దేశ్యం వారి ఆశయాలను, స్ఫూర్తిని ప్రజల్లోకి తీసుకువెళ్లడమేనని ఆయన తెలిపారు. ఈ కార్యక్రమంలో యువజన, పర్యాటక శాఖ అధికారులు, వివిధ శాఖల సిబ్బంది మరియు ఆర్యవైశ్య సంఘ ప్రతినిధులు పాల్గొన్నారు.
