బెల్ట్ షాపులపై చర్యలు చేపడతాం!

కాకతీయ, మ‌ణుగూరు (బూర్గంపాడు) : సారపాకలో మద్యం గుత్తేదారుల (సిండికేట్) దందాపై ‘కాకతీయ’ పత్రికలో ప్రచురితమైన కథనానికి అధికారులు, ప్రజాప్రతినిధుల నుంచి గట్టి స్పందన లభించింది. ఈ కథనంపై ఆదివారం సారపాక మేజర్ గ్రామ పంచాయతీ సర్పంచ్ కిషోర్ శివరాం నాయక్ స్పందిస్తూ కీలక వ్యాఖ్యలు చేశారు. సారపాక ప్రధాన కూడలి (సెంటర్)లో గుడి, బడి అనే తేడా లేకుండా, ఎక్కడబడితే అక్కడ విచ్చలవిడిగా వెలిసిన బెల్ట్ షాపులను తక్షణమే తొలగించాలని, లేకుంటే గ్రామ పంచాయతీ తరపున కఠిన చర్యలు తీసుకుంటామని బెల్ట్ షాప్ నిర్వాహకులను గట్టిగా హెచ్చరించారు. జనసంచారం ఎక్కువగా ఉండే ప్రదేశాల్లో, ఇళ్ల మధ్య ఇలాంటి అక్రమ బెల్ట్ షాపులు నడపడం వల్ల స్థానిక మహిళలు తీవ్ర ఇబ్బందులు ఎదుర్కొంటున్నారని సర్పంచ్ ఆవేదన వ్యక్తం చేశారు. అంతేకాకుండా, పాఠశాలలకు వెళ్లే విద్యార్థులు కూడా ఈ వాతావరణాన్ని చూసి చెడు మార్గాల వైపు మళ్లుతూ, చిన్న వయసులోనే మద్యానికి బానిసలుగా మారుతున్నారని ఆందోళన వ్యక్తం చేశారు. కాబట్టి ప్రజలు నివసించే ప్రాంతాల్లో, ప్రధాన రహదారి (మెయిన్ రోడ్డు) పక్కన ఉన్న బెల్ట్ షాపులను వెంటనే ఎత్తేయాలని స్పష్టం చేశారు.

ఈ విషయమై సర్పంచ్ కిషోర్ శివరాం నాయక్ స్థానిక వైన్ షాప్ యజమానులతో ఫోన్ ద్వారా మాట్లాడారు. నిబంధనలకు విరుద్ధంగా ఇళ్ల మధ్య, కాలనీల్లో నడుస్తున్న బెల్ట్ షాపులకు ఎలాంటి మద్యం బాటిళ్లను సరఫరా చేయవద్దని, ఒకవేళ విక్రయిస్తే వారిపై కూడా చర్యలు ఉంటాయని వైన్ షాప్ నిర్వాహకులకు తేల్చి చెప్పారు. గ్రామంలో శాంతిభద్రతలకు విఘాతం కలగకుండా అక్రమ మద్యం అమ్మకాలను పూర్తిగా అరికడతామని ఈ సందర్భంగా సర్పంచ్ స్పష్టం చేశారు.

📰 Share Epaper Clip