ప్రజలతో మర్యాదగా వ్యవహరించాలి
సమన్వయంతోనే శాంతిభద్రతల పరిరక్షణ సాధ్యం
వరంగల్ పోలీస్ కమిషనర్ ఎన్. శ్వేత, ఐపీఎస్
భారీ జనసందోహాల నిర్వహణపై ప్రత్యేక శిక్షణ
కాకతీయ, వరంగల్ బ్యూరో : పండగలు, జాతరలు, ఊరేగింపుల సమయంలో భారీగా ప్రజలు గుమిగూడినప్పుడు శాంతిభద్రతలను సమర్థంగా నిర్వహించడంతో పాటు, ప్రజల పట్ల పోలీసు అధికారులు, సిబ్బంది మర్యాదగా వ్యవహరించాలని వరంగల్ పోలీస్ కమిషనర్ ఎన్. శ్వేత అన్నారు. ఈ అంశాలపై పోలీస్ శిక్షకులకు మడికొండలోని పోలీస్ శిక్షణ కేంద్రంలో సోమవారం నాలుగు రోజుల శిక్షణ తరగతులను ప్రారంభించారు. వరంగల్, ఖమ్మం పోలీస్ కమిషనరేట్లతో పాటు మహబూబాబాద్, భద్రాద్రి కొత్తగూడెం జిల్లాలకు చెందిన ఆర్ఐలు, ఆర్ఎస్ఐలు, హెడ్కానిస్టేబుళ్లు, కానిస్టేబుళ్లు మొత్తం 43 మంది పోలీస్ శిక్షకులు ఈ శిక్షణలో పాల్గొంటున్నారు. పండగలు, జాతరలు, ఊరేగింపుల సమయంలో భారీ జనసమూహాల మధ్య విధులు నిర్వహించేటప్పుడు తీసుకోవాల్సిన జాగ్రత్తలు, ప్రజలతో వ్యవహరించాల్సిన తీరుపై శిక్షణ ఇస్తున్నారు.
తరగతి గది బోధనతో పాటు ప్రాక్టికల్ శిక్షణ
శాంతిభద్రతలకు సంబంధించిన కార్యక్రమాల్లో భారీగా ప్రజలు గుమిగూడినప్పుడు జనసందోహాన్ని నియంత్రించడం, అత్యవసర పరిస్థితుల్లో సమన్వయంతో పనిచేయడం, ఉద్రిక్తతలను అదుపు చేయడం, ప్రజలతో మర్యాదగా వ్యవహరించడం వంటి అంశాలను శిక్షణలో బోధిస్తున్నారు. తరగతి గదుల్లో బోధించడంతో పాటు ఆయా అంశాలను ప్రాక్టికల్గా కూడా అధికారులు వివరిస్తున్నారు. శిక్షణ పొందిన పోలీస్ శిక్షకులు తమ తమ జిల్లాల్లోని పోలీస్ యూనిట్లలో అధికారులు, సిబ్బందికి ఇదే తరహాలో శిక్షణ అందించనున్నారు. తద్వారా పండగలు, జాతరలు, ఊరేగింపుల సందర్భంగా ప్రజలకు మెరుగైన పోలీసింగ్ అందించడంతో పాటు శాంతిభద్రతలను సమర్థంగా నిర్వహించేలా సిబ్బందిని సన్నద్ధం చేయనున్నారు. కార్యక్రమంలో అదనపు డీసీపీలు ప్రభాకర్రావు, శ్రీనివాస్, సీటీసీ ఏసీపీ రమణబాబు, ఆర్ఐలు సింహాచలం, శ్రీనివాస్, ఇన్స్పెక్టర్ సూర్యప్రసాద్తో పాటు శిక్షణ కేంద్రం పోలీస్ అధికారులు, సిబ్బంది పాల్గొన్నారు.
