సహకార రైతులకు తక్కువ వడ్డీకే రుణాలు అందించాలి..
*44వ మహాజనసభ సమావేశంలో రైతుల డిమాండ్..
*రుణమాఫీలో అన్యాయం జరిగిందని రైతుల ఆవేదన
కాకతీయ, గీసుగొండ: సహకార సంఘ రైతులకు తక్కువ వడ్డీకే రుణాలు అందించాలని ఊకల్ సహకార సంఘ రైతులు డిమాండ్ చేశారు. మండలంలోని ఊకల్ రైతు సేవా సహకార సంఘం లిమిటెడ్ 44వ మహాజన సభ చైర్మన్ బొమ్మల రమేష్ అధ్యక్షతన నిర్వహించారు. 72వ అఖిల భారత సహకార వారోత్సవాల్లో భాగంగా నిర్వహించిన ఈ సభలో సంఘం కార్యకలాపాలు,ఆర్థిక లావాదేవీలు,రైతులకు అందిస్తున్న రుణ సదుపాయాలపై చర్చించారు. ఈ సందర్భంగా సీఈఓ రాంబాబు మాట్లాడుతూ రైతులకు వ్యవసాయ రుణాలను విరివిగా అందిస్తున్నామని తెలిపారు. 2025లో 131 మంది సభ్యులు సభ్యత్వాన్ని విరమించుకోగా,79 మంది కొత్తగా సభ్యులుగా చేరారని,2026 మార్చి 31 నాటికి సంఘంలో మొత్తం 6,303 మంది సభ్యులు ఉన్నారని వివరించారు. ప్రస్తుత ఆర్థిక సంవత్సరంలో రూ.18,33,285/-వసూలు చేశామని, సంఘంలో రూ.3,41,90,614/- వాటాధనం ఉన్నట్లు తెలిపారు. అయితే సమావేశంలో పలువురు రైతులు సంఘం తీరుపై తీవ్ర ఆగ్రహం వ్యక్తం చేశారు. ఇతర బ్యాంకులతో పోలిస్తే సహకార సంఘంలో రుణాలపై అధిక వడ్డీ వసూలు చేస్తున్నారని, రైతులకు తక్కువ వడ్డీకే రుణాలు అందించాలని డిమాండ్ చేశారు. రుణమాఫీ విషయంలో అధికారుల తప్పిదాల కారణంగా అర్హత ఉన్నప్పటికీ తమకు అన్యాయం జరిగిందని పలువురు రైతులు ఆవేదన వ్యక్తం చేశారు. రైతుల సమస్యలను పరిష్కరించడంతో పాటు సహకార సంఘాల ద్వారా రైతులకు అందే రుణాలపై వడ్డీ భారాన్ని తగ్గించాలని కోరారు. ఈ కార్యక్రమంలో వైస్ చైర్మన్ మున్నంగి జనార్దన్ రెడ్డి,డైరెక్టర్లు శ్రీనివాస్,ఆవుల రజిత బొమ్మాల లక్ష్మి,చల్ల కృష్ణా రెడ్డి,చెవ్వ పాపయ్య, బానోతు నిమ్మ,సంఘ సిబ్బంది,సంఘ సభ్యులు, పాల్గొన్నారు
