దానం నాగేందర్ ఎమ్మెల్యే సభ్యత్వం రద్దు
ఖైరతాబాద్ అసెంబ్లీ స్థానం ఖాళీగా ఉన్నట్లు ప్రకటన
హైకోర్టు తీర్పు మేరకు శాసనసభ నోటిఫికేషన్
23.04.2024 నుంచే అనర్హత అమలు
పదో షెడ్యూల్, రాజ్యాంగ నిబంధనల ప్రకారం చర్య
హైకోర్టు తీర్పు ఆధారంగా శాసనసభ కార్యదర్శి రెండ్ల తిరుపతి ఉత్తర్వులు
కాకతీయ,తెలంగాణ బ్యూరో : ఖైరతాబాద్ అసెంబ్లీ నియోజకవర్గం నుంచి ఎన్నికైన దానం నాగేందర్ ఎమ్మెల్యే సభ్యత్వం రద్దయింది. తెలంగాణ హైకోర్టు సెప్టెంబర్ 18న ఇచ్చిన తీర్పు మేరకు ఆయనను శాసనసభ సభ్యత్వానికి అనర్హుడిగా ప్రకటిస్తూ తెలంగాణ శాసనసభ కార్యదర్శి రెండ్ల తిరుపతి శనివారం గెజిట్ నోటిఫికేషన్ జారీ చేశారు. దానం నాగేందర్ సభ్యత్వం 23.04.2024 నుంచి అమల్లోకి వచ్చే విధంగా రద్దయినట్లు నోటిఫికేషన్లో స్పష్టం చేశారు. హైకోర్టు డబ్ల్యూపీ నంబర్లు 8409, 8647/2026లో సెప్టెంబర్ 18న ఇచ్చిన తీర్పును అనుసరించి ఈ నోటిఫికేషన్ జారీ చేసినట్లు శాసనసభ పేర్కొంది. 60 ఖైరతాబాద్ అసెంబ్లీ నియోజకవర్గం నుంచి తెలంగాణ శాసనసభకు ఎన్నికైన దానం నాగేందర్ పదో షెడ్యూల్లోని పేరా 2(1)(ఏ)తో పాటు రాజ్యాంగంలోని ఆర్టికల్ 191(2) ప్రకారం సభ్యత్వానికి అనర్హుడిగా నిలిచినట్లు గెజిట్లో పేర్కొన్నారు.
23.04.2024 నుంచే అమల్లోకి
దానం నాగేందర్ సభ్యత్వానికి సంబంధించిన అనర్హత 23.04.2024 నుంచి అమల్లోకి వచ్చినట్లు నోటిఫికేషన్లో స్పష్టం చేశారు. అదే తేదీ నుంచి ఖైరతాబాద్ అసెంబ్లీ నియోజకవర్గ శాసనసభ స్థానం ఖాళీగా ఉన్నట్లు ప్రకటించారు. ఈ మేరకు తెలంగాణ రాజ్య శాసనసభ అధికారిక గెజిట్లో ప్రకటన వెలువడింది. శనివారం హైదరాబాద్లో విడుదలైన తెలంగాణ రాజపత్రము ప్రత్యేక సంచికలో ఈ ప్రకటనను ప్రచురించారు. సీ.నెం.210/శాసన/2026గా జారీ చేసిన నోటిఫికేషన్పై శాసనసభ కార్యదర్శి రెండ్ల తిరుపతి సంతకం చేశారు. హైకోర్టు తీర్పు ఆధారంగా సభ్యత్వ అనర్హత, నియోజకవర్గ స్థానం ఖాళీపై శాసనసభ అధికారికంగా ప్రకటన చేయడంతో ఖైరతాబాద్ స్థానానికి సంబంధించిన తదుపరి ఎన్నికల ప్రక్రియకు ఈ నోటిఫికేషన్ కీలక ఆధారంగా నిలవనుంది.
