అక్రిడిటేషన్ కార్డుల జారీలో అవకతవకలపై ఫిర్యాదు
హన్మకొండ మాజీ డీపీఆర్ఓ అయూబ్ఖాన్పై విచారణకు కలెక్టర్ ఆదేశం
విచారణ అధికారిగా డీఆర్వో శ్రీనివాస్ నియామకం
కాకతీయ, వరంగల్ ప్రతినిధి: హనుమకొండ పూర్వ డీపీఆర్ఓ, ప్రస్తుతం వరంగల్ నగరపాలక సంస్థ పీఆర్ఓగా పనిచేస్తున్న అయూబ్ఖాన్పై విచారణకు జిల్లా కలెక్టర్ చాహత్ బాజ్పాయ్ ఆదేశించారు. విచారణ అధికారిగా జిల్లా రెవెన్యూ అధికారి శ్రీనివాస్ను నియమించారు. హనుమకొండ జిల్లా అధికారిక వెబ్సైట్లో చాహత్ బాజ్పాయ్ కలెక్టర్గా, కె. శ్రీనివాస్ జిల్లా రెవెన్యూ అధికారిగా ప్రస్తుతం నమోదై ఉన్నారు. 2026–28 సంవత్సరానికి జర్నలిస్టుల అక్రిడిటేషన్ కార్డుల జారీలో అవినీతి, అక్రమాలకు పాల్పడ్డారంటూ జిల్లా అక్రిడిటేషన్ కమిటీ సభ్యులు మంగళవారం కలెక్టర్కు లిఖితపూర్వకంగా ఫిర్యాదు చేశారు. 10 మందితో కూడిన కమిటీ రెండుసార్లు సమావేశమై జర్నలిస్టుల దరఖాస్తులను పరిశీలించి అర్హులు, పెండింగ్ దరఖాస్తులపై నిర్ణయం తీసుకున్నప్పటికీ కమిటీ సిఫార్సులను పక్కనపెట్టి కార్డులు మంజూరు చేశారని ఫిర్యాదులో పేర్కొన్నారు. రాజకీయ నాయకుల వద్ద పనిచేసేవారికి, రియల్టర్లకు, జర్నలిస్టుల కుటుంబ సభ్యులకు కార్డులు జారీ చేశారని ఆరోపించారు. కమిటీ సమావేశాల్లోని జాబితాలను సభ్యులకు అందించలేదని తెలిపారు. ఫిర్యాదును స్వీకరించిన కలెక్టర్ విచారణకు ఆదేశించగా, అనర్హులను తొలగించి వర్కింగ్ జర్నలిస్టులకు న్యాయం చేయాలని సభ్యులు కోరారు. ఫిర్యాదు చేసిన వారిలో గాడిపల్లి మధు, బీఆర్ లెనిన్, గడ్డం కేశవమూర్తి, మస్కపురి సుధాకర్, కంకణాల సంతోష్, బోల్ల అమర్, గోకారపు శ్యాం, వల్లాల జగన్, ఎన్. బుచ్చిరెడ్డి, నయీమ్ ఉన్నారు.
