త్యాగాలే పోలీసుల చరిత్రకు చిరునామా!

త్యాగాలే పోలీసుల చరిత్రకు చిరునామా!

ప్రజల రక్షణే లక్ష్యంగా ప్రాణాలర్పించిన అమరవీరులకు ఘన నివాళి

లింగంపేటలో పోలీస్ అమరవీరుల సంస్మరణ దినం..

కుటుంబాలకు అండగా ఉంటామని ఎస్పీ మహేష్ బి.గితే హామీ

కాకతీయ, చందుర్తి: ప్రజల ప్రాణాలకు రక్షణగా నిలిచి.. శాంతి భద్రతల పరిరక్షణ కోసం తమ ప్రాణాలనే త్యాగం చేసిన పోలీస్ అమరవీరుల సేవలు చిరస్మరణీయమని రాజన్న సిరిసిల్ల జిల్లా ఎస్పీ మహేష్ బి.గితే అన్నారు. విధి నిర్వహణలో అమరులైన పోలీసుల త్యాగాలు ప్రతి ఒక్కరికీ స్ఫూర్తిదాయకమని పేర్కొన్నారు.

లింగంపేటలో ఘనంగా సంస్మరణ దినం

పోలీస్ అమరవీరుల సంస్మరణ దినం సందర్భంగా చందుర్తి మండలం లింగంపేట గ్రామ శివారులోని పోలీస్ అమరవీరుల స్తూపం వద్ద మంగళవారం ప్రత్యేక కార్యక్రమం నిర్వహించారు. ఎస్పీ మహేష్ బి.గితే, పోలీస్ అధికారులు, అమరవీరుల కుటుంబ సభ్యులు కలిసి స్తూపం వద్ద పుష్పాంజలి ఘటించి ఘనంగా నివాళులర్పించారు. అనంతరం సాయుధ పోలీసులు శోక శస్త్ర నిర్వహించగా, దేశవ్యాప్తంగా గత ఏడాది నుంచి ఇప్పటివరకు విధి నిర్వహణలో అమరులైన 154 మంది పోలీసుల పేర్లను చదివి వినిపించారు. రెండు నిమిషాలు మౌనం పాటించి అమరవీరుల సేవలను స్మరించుకున్నారు.

అమరవీరుల త్యాగాలతోనే మెరుగైన భద్రత

ఈ సందర్భంగా ఎస్పీ మాట్లాడుతూ.. ప్రజల భద్రత కోసం పోలీసులు ఎన్నో క్లిష్ట పరిస్థితులను ఎదుర్కొంటూ విధులు నిర్వహిస్తున్నారని తెలిపారు. అంతర్గత భద్రత విధుల్లో జిల్లాకు చెందిన ఎనిమిది మందికి పైగా పోలీసులు ప్రాణాలు కోల్పోయారని గుర్తుచేశారు. వారి త్యాగాలను ఎప్పటికీ మరువకూడదని, అమరవీరుల స్ఫూర్తితో ప్రజలకు మరింత మెరుగైన సేవలు అందిస్తూ శాంతి భద్రతల పరిరక్షణకు కృషి చేస్తున్నామని పేర్కొన్నారు.

అమరుల కుటుంబాలకు అండగా ఉంటాం

విధి నిర్వహణలో ప్రాణాలు కోల్పోయిన పోలీసుల కుటుంబాల త్యాగం కూడా వెలకట్టలేనిదని భావించిన ఎస్పీ.. కార్యక్రమానికి హాజరైన కుటుంబ సభ్యులతో ప్రత్యేకంగా మాట్లాడి వారి కుటుంబ పరిస్థితులు, సమస్యలను అడిగి తెలుసుకున్నారు. వారు విన్నవించిన సమస్యలను సాధ్యమైనంత త్వరగా పరిష్కరించేందుకు చర్యలు తీసుకుంటామని హామీ ఇచ్చి, జ్ఞాపికలను అందజేశారు.

అక్టోబర్ 31 వరకు అవగాహన కార్యక్రమాలు

పోలీస్ అమరవీరుల త్యాగాలను ప్రజలకు తెలియజేసేందుకు అక్టోబర్ 31 వరకు రక్తదాన శిబిరాలు, సైకిల్ ర్యాలీలు, క్యాండిల్ ర్యాలీలు, రన్, ఓపెన్ హౌస్, వ్యాసరచన పోటీలు, ఫొటో, వీడియో పోటీలు నిర్వహించనున్నట్లు ఎస్పీ వెల్లడించారు.

ఈ కార్యక్రమంలో డీఎస్పీలు నాగేంద్రచారి, శ్రీనివాస్, వెంకటేశ్వర్లు, సీఐలు, ఆర్‌ఐలు, ఎస్‌ఐలు, ఆర్‌ఎస్‌ఐలు, పోలీస్ సిబ్బంది, అమరవీరుల కుటుంబ సభ్యులు పాల్గొన్నారు.