హనీట్రాప్‌లో ఏసీపీ, ఇన్‌స్పెక్టర్‌!
మాజీ ప్రియురాలి సాయంతో సైబర్‌ నేరగాడి వలపు వల
వెయ్యి మంది వరకు బాధితులున్నట్లు పోలీసుల విచారణలో వెల్లడి
రూ.25 లక్షల వసూళ్లపై ప్రాథమికంగా గుర్తింపు
కాకతీయ, హైదరాబాద్: మహిళల పేర్లతో నకిలీ సామాజిక మాధ్యమ ఖాతాలు సృష్టించి హనీట్రాప్‌ ద్వారా బాధితుల నుంచి డబ్బులు వసూలు చేసిన సైబర్‌ నేరగాడు పవన్‌కుమార్‌ వ్యవహారం సంచలనం రేపుతోంది. ఈ వలలో హైదరాబాద్ సిటీ కమిషనరేట్‌ పరిధిలోని ఓ ఏసీపీ, మరో ఇన్‌స్పెక్టర్‌ కూడా చిక్కినట్లు పోలీసుల విచారణలో గుర్తించినట్లు సమాచారం. పవన్‌కుమార్‌ తన మాజీ ప్రియురాలి సహకారంతో ఈ వ్యవహారం నడిపినట్లు తెలుస్తోంది. అందమైన యువతుల ఫొటోలతో 13 ఇన్‌స్టాగ్రామ్‌, 14 ఫేస్‌బుక్‌ ఖాతాలు సృష్టించి వందలాది మందితో పరిచయాలు పెంచుకున్నాడు. చాటింగ్‌ ద్వారా బాధితులను లైంగిక సంభాషణల వైపు మళ్లించి, వారి వ్యక్తిగత ఫొటోలు, వీడియోలను సేకరించేవాడని సమాచారం. అవసరమైన సందర్భాల్లో ఫోన్‌లో యువతిగా మాట్లాడేందుకు మాజీ ప్రియురాలి సాయం తీసుకునేవాడని విచారణలో వెల్లడైనట్లు తెలుస్తోంది. అనంతరం మార్ఫింగ్‌ చేసిన చిత్రాలు, అభ్యంతరకర ఫొటోలు, వీడియోలు పంపి, వాటిని బయటపెడతానని బెదిరిస్తూ డబ్బులు వసూలు చేసేవాడని పోలీసులు గుర్తించినట్లు సమాచారం. ఇప్పటివరకు ప్రాథమిక విచారణలో 82 మంది బాధితులను గుర్తించి, వారి నుంచి రూ.25 లక్షలు వసూలు చేసినట్లు తేలిందని తెలుస్తోంది. మొత్తం బాధితుల సంఖ్య వెయ్యి వరకు ఉండవచ్చని, వసూళ్లు కోట్ల రూపాయలకు చేరే అవకాశం ఉందని అంచనా వేస్తున్నారు. దుబాయ్‌, టర్కీ, పాకిస్థాన్‌, కెనడాతో పాటు తెలంగాణ, ఆంధ్రప్రదేశ్‌, కేరళ, తమిళనాడు, కర్ణాటక, పంజాబ్‌ రాష్ట్రాలకు చెందినవారు బాధితుల్లో ఉన్నట్లు సమాచారం. వైద్యులు, అధ్యాపకులు, ప్రైవేటు ఉద్యోగులు, గిగ్‌ వర్కర్లతో పాటు తన స్నేహితులను కూడా నిందితుడు మోసగించినట్లు పోలీసులు చెబుతున్నారు. ఈ వ్యవహారంపై దర్యాప్తు కొనసాగుతోంది.
