జల్‌–జంగల్‌–జమీన్‌ నినాదం ఆదర్శం
ఆదివాసీల హక్కుల కోసం కొమురం భీం పోరాటం : మహేశ్‌కుమార్‌ గౌడ్
కొమురం భీం జయంతి సందర్భంగా నివాళులర్పించిన పీసీసీ చీఫ్‌
కాకతీయ, నిజామాబాద్: ఆదివాసీల హక్కుల పరిరక్షణ కోసం ప్రాణత్యాగం చేసిన తెలంగాణ వీరుడు కొమురం భీం పోరాట స్ఫూర్తి చిరస్మరణీయమని టీపీసీసీ అధ్యక్షుడు మహేశ్‌కుమార్‌ గౌడ్ అన్నారు. కొమురం భీం జయంతి సందర్భంగా ఆయనకు ఘనంగా నివాళులర్పించారు. నిజాం నిరంకుశ పాలనకు వ్యతిరేకంగా గిరిజనుల హక్కుల కోసం కొమురం భీం సాగించిన పోరాటం తెలంగాణ చరిత్రలో ప్రత్యేక స్థానాన్ని సంపాదించుకుందని పేర్కొన్నారు. ‘జల్‌–జంగల్‌–జమీన్‌’ నినాదంతో ఆదివాసీలకు భూమి, అటవీ వనరులు, జీవించే హక్కులపై చైతన్యం కల్పించిన గొప్ప యోధుడని కొనియాడారు. కొమురం భీం ఆశయాలకు అనుగుణంగా కాంగ్రెస్‌ ప్రభుత్వం ఆదివాసీలు, గిరిజనుల సంక్షేమం, హక్కుల పరిరక్షణకు కట్టుబడి పనిచేస్తోందన్నారు. గిరిజనుల భూములు, అటవీ హక్కులతో పాటు విద్య, వైద్యం, ఉపాధి, ఆర్థిక సాధికారతకు ప్రాధాన్యమిస్తున్నట్లు తెలిపారు. కొమురం భీం త్యాగం, ధైర్యం, పోరాట స్ఫూర్తిని భావితరాలకు అందించాల్సిన బాధ్యత ప్రతి ఒక్కరిపై ఉందన్నారు. ఆయన ఆశయాల సాధనకు అందరూ పునరంకితం కావాలని మహేశ్‌కుమార్‌ గౌడ్ పిలుపునిచ్చారు.
