సీఐడీ కలకలం.. హైడ్రామా మధ్య ఏకగ్రీవం
బాదం ప్రవీణ్‌ నామినేషన్‌ ఉపసంహరణ
అధ్యక్షుడిగా కాట్రగడ్డ సతీష్‌ ఎన్నిక
కాకతీయ, ములుగు: ములుగు జిల్లా రైస్‌ మిల్లర్స్‌ అసోసియేషన్‌ అధ్యక్ష ఎన్నికలు నాటకీయ పరిణామాల మధ్య ముగిశాయి. ఎన్నికల రోజే అధ్యక్ష పదవికి పోటీ చేస్తున్న బాదం ప్రవీణ్‌తో పాటు మరో ఆరుగురు రైస్‌ మిల్లర్లను సీబీ సీఐడీ అధికారులు అదుపులోకి తీసుకోవడం కలకలం రేపింది. తెల్లవారుజామున జాకారం సమీపంలోని జాతీయ రహదారిపై ప్రవీణ్‌ను అదుపులోకి తీసుకున్న అధికారులు హన్మకొండ నుంచి మధ్యాహ్నం ఎన్నికలు జరిగే ప్రదేశానికి తీసుకొచ్చారు. దీంతో ఎన్నికల ప్రక్రియపై ఉత్కంఠ నెలకొంది. అందరూ ప్రవీణ్‌ తిరిగి అధ్యక్ష పదవికి పోటీ చేస్తారని భావించినప్పటికీ ఆయన అనూహ్యంగా తన నామినేషన్‌ను ఉపసంహరించుకున్నారు. దీంతో కాట్రగడ్డ సతీష్‌ అధ్యక్షుడిగా ఏకగ్రీవంగా ఎన్నికయ్యారు. అనంతరం మద్దతుదారులు బాణాసంచా కాల్చి సంబరాలు చేసుకున్నారు. మరోవైపు కాంగ్రెస్‌లోని రెండు వర్గాలు వేర్వేరు అభ్యర్థులకు మద్దతు ఇచ్చాయనే ప్రచారం రాజకీయ చర్చకు దారితీసింది.
మిల్లుల్లో తనిఖీలు.. సీఐడీ దర్యాప్తుపై చర్చ
ప్రవీణ్‌కు చెందిన రెండు మిల్లులతో పాటు మరో నాలుగు మిల్లుల్లో విజిలెన్స్‌ అధికారులు తనిఖీలు నిర్వహించినట్లు సమాచారం. రాష్ట్రవ్యాప్తంగా సీఎంఆర్‌ బియ్యం సరఫరాలో అక్రమాల ఆరోపణలపై సీఐడీ దర్యాప్తు కొనసాగుతున్నట్లు తెలుస్తోంది. అయితే ప్రవీణ్‌ను ఏ కేసులో అదుపులోకి తీసుకున్నారు? నామినేషన్‌ ఉపసంహరణకు కారణాలేమిటి? ఎన్నికల వేళ చోటుచేసుకున్న పరిణామాల వెనుక రాజకీయ జోక్యం ఉందా? అనే అంశాలపై అధికారిక స్పష్టత రావాల్సి ఉంది.
