పరకాల బీఆర్‌ఎస్‌లో ఫ్లెక్సీ చిచ్చు!
చల్లా వర్గీయులపై పోచంపల్లి అనుచరుల ఫిర్యాదు
కౌన్సిలర్‌ సహా ఏడుగురిపై కేసు నమోదు
పోలీస్‌స్టేషన్‌కు చేరిన ఆధిపత్య పోరు
మాజీ ఎమ్మెల్యే చల్లా ధర్మారెడ్డి, ఎమ్మెల్సీ పోచంపల్లి శ్రీనివాస్‌రెడ్డి వర్గాల మధ్య ముదిరిన విభేదాలు
కాకతీయ, హ‌న్మ‌కొండ : పరకాల బీఆర్‌ఎస్‌లో అంతర్గత విభేదాలు బహిరంగ పోరుగా మారుతున్నాయి. మాజీ ఎమ్మెల్యే చల్లా ధర్మారెడ్డి వర్గానికి చెందిన బీఆర్‌ఎస్‌ కౌన్సిలర్‌ సహా ఏడుగురిపై పరకాల పోలీసులు కేసు నమోదు చేయడంతో రాజకీయ వాతావరణం వేడెక్కింది. ఎమ్మెల్సీ పోచంపల్లి శ్రీనివాస్‌రెడ్డి వర్గీయులు ఇచ్చిన ఫిర్యాదు మేరకు బుధవారం ఈ కేసు నమోదైంది. పోచంపల్లి ఫౌండేషన్‌ ఆధ్వర్యంలో నిర్వహిస్తున్న క్రికెట్‌ టోర్నమెంట్‌ నిర్వాహకులను బెదిరించడంతోపాటు ఫ్లెక్సీలను చించివేసినట్లు ఫిర్యాదులో పేర్కొన్నారు. ఈ పరిణామం ఇప్పటికే రెండు వర్గాల మధ్య కొనసాగుతున్న విభేదాలను మరోసారి తెరపైకి తెచ్చింది. తాజా కేసు నేపథ్యంలో పార్టీ అధిష్ఠానం కూడా వ్యవహారంపై ఆరా తీస్తున్నట్లు రాజకీయ వర్గాల్లో సమాచారం. ఇద్దరు నేతలకూ అధిష్ఠానం వద్ద ప్రాధాన్యం ఉండటంతో ఈ వివాదానికి ఎలా ముగింపు పలుకుతారన్నది ఆసక్తికరంగా మారింది.
కౌన్సిలర్‌ సహా ఏడుగురిపై కేసు
దీపావళి పర్వదినాన్ని పురస్కరించుకుని ఎమ్మెల్సీ పోచంపల్లి శ్రీనివాస్‌రెడ్డికి చెందిన స్వచ్ఛంద సంస్థ ట్రస్ట్‌ ఆధ్వర్యంలో పరకాలలో క్రికెట్‌ టోర్నమెంట్‌ నిర్వహించారు. ఈ సందర్భంగా పట్టణంలో ఏర్పాటు చేసిన ఫ్లెక్సీల్లో మాజీ ఎమ్మెల్యే చల్లా ధర్మారెడ్డి ఫొటో లేకపోవడం వివాదానికి కారణమైంది. దీంతో చల్లా వర్గీయులు ఆగ్రహం వ్యక్తం చేస్తూ పోచంపల్లి వర్గీయులు ఏర్పాటు చేసిన ఫ్లెక్సీలను చించివేసినట్లు ఆరోపణలు వచ్చాయి. క్రికెట్‌ పోటీల నిర్వహణతో మొదలైన వ్యవహారం కాస్తా రెండు వర్గాల మధ్య రాజకీయ ఆధిపత్య పోరుగా మారింది. ఈ ఘటనపై పోచంపల్లి వర్గీయులు పోలీసులను ఆశ్రయించడంతో వివాదం మరో మలుపు తిరిగింది. పోచంపల్లి వర్గీయుల ఫిర్యాదు మేరకు పోలీసులు చల్లా ధర్మారెడ్డి వర్గానికి చెందిన ఏడుగురిపై కేసు నమోదు చేశారు. వారిలో పరకాల ఒకటో వార్డు కౌన్సిలర్‌ దుబాసి వెంకటస్వామితోపాటు గొర్రె రాజు, మోరే రాజేందర్‌, ఏకు నవీన్‌, శనిగరపు నవీన్‌, మార్త విక్రమ్‌, ఒంటేరు దినేష్‌ ఉన్నారు. ఫౌండేషన్‌ క్రికెట్‌ పోటీల నిర్వాహకులను బెదిరించారని, ఫ్లెక్సీలను ధ్వంసం చేశారని ఫిర్యాదులో పేర్కొన్నారు.
అధిష్ఠానం జోక్యం తప్పనిసరా?
పరకాల నియోజకవర్గంలో మాజీ ఎమ్మెల్యే చల్లా ధర్మారెడ్డి, ఎమ్మెల్సీ పోచంపల్లి శ్రీనివాస్‌రెడ్డి వర్గాల మధ్య కొంతకాలంగా అంతర్గత విభేదాలు కొనసాగుతున్నాయి. పార్టీ కార్యక్రమాలు, స్థానిక రాజకీయ వ్యవహారాలు, నాయకులకు దక్కుతున్న ప్రాధాన్యం వంటి అంశాల్లో రెండు వర్గాల మధ్య సమన్వయం కొరవడినట్లు కనిపిస్తోంది. బయటకు పార్టీ ఒక్కటిగానే ఉన్నా.. క్షేత్రస్థాయిలో మాత్రం వర్గాల మధ్య దూరం పెరుగుతూ వస్తోందనే అభిప్రాయాలు వ్యక్తమవుతున్నాయి. తాజాగా ఫ్లెక్సీ వివాదం పోలీస్‌స్టేషన్‌కు చేరడంతో ఈ కోల్డ్‌వార్‌ బహిరంగ పోరుగా మారింది. పోచంపల్లి శ్రీనివాస్‌రెడ్డి ఈ వ్యవహారాన్ని తీవ్రంగా పరిగణిస్తున్నట్లు ఆయన వర్గీయులు చెబుతున్నారు. మరోవైపు నియోజకవర్గంలో తనకు బలమైన అనుచరగణం ఉన్న మాజీ ఎమ్మెల్యే చల్లా ధర్మారెడ్డి కూడా తన వర్గం విషయంలో వెనక్కి తగ్గే పరిస్థితి లేదనే రాజకీయ విశ్లేషణలు వినిపిస్తున్నాయి. కేసులో తన వర్గానికి చెందిన కౌన్సిలర్‌తోపాటు మరికొందరి పేర్లు ఉండటంతో వారి వెనుక నిలబడాల్సిన పరిస్థితి ఆయనకు ఉందనే అభిప్రాయాలు వ్యక్తమవుతున్నాయి. ఈ నేపథ్యంలో అధిష్ఠానం ఎవరితో ఎలా మాట్లాడి సమస్యను పరిష్కరిస్తుందన్నది కీలకంగా మారింది. ఒక వర్గానికి ప్రాధాన్యం ఇస్తే మరో వర్గం అసంతృప్తికి గురయ్యే పరిస్థితి ఉండటంతో పార్టీ పెద్దలకు ఈ వ్యవహారం సవాలుగా మారనుంది. పరకాల బీఆర్‌ఎస్‌లో నెలకొన్న ఈ గ్రూపు రాజకీయాలకు అధిష్ఠానం ఎలా చెక్‌ పెడుతుందో, రెండు వర్గాలు సయోధ్యకు వస్తాయో లేదో వేచి చూడాలి.
