కాంగ్రెస్ ప్రజలను మోసం చేస్తోంది : దాస్యం వినయ్ భాస్కర్..
వైఎస్ఆర్ గుడిసెవాసులకు పట్టాలు ఇవ్వాలి..
పేదల భూముల జోలికొస్తే ఊరుకోం..
కాకతీయ, కాజీపేట : కాంగ్రెస్ ప్రభుత్వం ఎన్నికల సమయంలో ప్రజలకు ఇచ్చిన హామీలను అమలు చేయకుండా మోసం చేస్తోందని ప్రభుత్వ మాజీ చీఫ్ విప్, మాజీ ఎమ్మెల్యే దాస్యం వినయ్ భాస్కర్ విమర్శించారు. మంగళవారం కాజీపేట ప్రెస్ క్లబ్లో నిర్వహించిన మీడియా సమావేశంలో ఆయన మాట్లాడుతూ.. 2023 ఎన్నికల్లో 420 హామీలు, ఆరు గ్యారంటీల పేరుతో అధికారంలోకి వచ్చిన కాంగ్రెస్ ప్రభుత్వం 100 రోజుల్లో హామీలన్నీ అమలు చేస్తామని చెప్పి మూడేళ్లు గడుస్తున్నా పట్టించుకోవడం లేదన్నారు. కాజీపేటలోని వైఎస్ఆర్ గుడిసెవాసులకు 100 రోజుల్లో పట్టాలు, బ్రిడ్జి నిర్మిస్తామని హామీ ఇచ్చిన ఎమ్మెల్యే నాయిని రాజేందర్ రెడ్డి ఇప్పుడు వారిని ఎందుకు ఖాళీ చేయిస్తున్నారని ప్రశ్నించారు. పేదల గుడిసెలను కూల్చేందుకు జేసీబీలు పంపడం దారుణమన్నారు. గుడిసెవాసులకు అండగా నిలుస్తున్న బీఆర్ఎస్ నాయకులపై కేసులు పెట్టడం అన్యాయమని, వెంటనే పేదలకు పట్టాలు మంజూరు చేయాలని డిమాండ్ చేశారు. న్యూ శాయంపేట ఆలయం, కుడా భూములు, మైనార్టీల భూముల వ్యవహారాల్లోనూ అక్రమాలకు ప్రయత్నించారని ఆరోపించారు. ప్రజల తరఫున పోరాటం కొనసాగిస్తామని స్పష్టం చేశారు. కుడా మాజీ చైర్మన్ మర్రి యాదవ రెడ్డి మాట్లాడుతూ.. ఎమ్మెల్యే నాయిని రాజేందర్ రెడ్డి అసభ్య పదజాలంతో విమర్శలు చేయడం మానుకోవాలని హితవు పలికారు. బాలసముద్రంలోని కుడా భూముల వేలంలో అవినీతి జరిగిందని, రూ.1.50 లక్షల విలువైన భూమిని రూ.65 వేలకే ఎలా విక్రయిస్తారని ప్రశ్నించారు. కాజీపేట చౌరస్తా రోడ్లపై గుంతలు పూడ్చలేని వారు అభివృద్ధి గురించి మాట్లాడటం విడ్డూరమన్నారు. వైఎస్ఆర్ గుడిసెవాసులను ఇబ్బంది పెట్టకుండా వారికి పట్టాలు ఇవ్వాలని, వారికి ఎమ్మెల్యే క్షమాపణ చెప్పాలని డిమాండ్ చేశారు. ఈ సమావేశంలో మాజీ కార్పొరేటర్లు నర్సింగరావు, జోరిక రమేష్, రాష్ట్ర నాయకులు నార్లగిరి రమేష్, గబ్బెట శ్రీనివాస్, మర్యాల కృష్ణ, సుంచు కృష్ణ, కటాపురం రాజు, బస్వ యాదగిరి, ఎస్కే మహమూద్, ఎండీ అఫ్జల్ తదితరులు పాల్గొన్నారు.

