భూనిర్వాసితులకు ప్రత్యేకంగా ఇళ్లు కేటాయించాలి..
*భూసేకరణ అక్రమాలపై సమగ్ర విచారణ జరిపించాలి..
*బీజేపీ గీసుగొండ మండల అధ్యక్షుడు కొంగర రవికుమార్ డిమాండ్
కాకతీయ, గీసుగొండ:కాకతీయ మెగా టెక్స్టైల్ పార్క్ భూనిర్వాసితుల సమస్యలను ప్రభుత్వం వెంటనే పరిష్కరించి, వారికి న్యాయం చేయాలని బీజేపీ గీసుగొండ మండల అధ్యక్షుడు కొంగర రవికుమార్ డిమాండ్ చేశారు. శాయంపేట హవేలి గ్రామంలో భూములు కోల్పోయిన రైతులకు ఏళ్ల తరబడి పెండింగ్లో ఉన్న నష్టపరిహారాన్ని వెంటనే చెల్లించాలని, పరిహారం చెల్లించలేని పక్షంలో సంబంధిత భూములను తిరిగి రైతులకు అప్పగించాలని కోరారు. రైతులకు ఇచ్చిన హామీ మేరకు 100 గజాల ప్లాట్లతో పాటు డబుల్ బెడ్రూమ్ ఇళ్లను ప్రత్యేకంగా కేటాయించాలని, భూనిర్వాసితుల ఇళ్లను ఇందిరమ్మ పథకంలో కలపకుండా వారి హక్కుగా గుర్తించాలని అన్నారు. ఇళ్ల నిర్మాణం కోసం మరో రూ.1.50 లక్షలు చెల్లించాలనే నిబంధనతో రైతులపై అదనపు భారం మోపడం సరికాదని, నాణ్యమైన ఇళ్లను ప్రభుత్వమే నిర్మించి ఇవ్వాలని డిమాండ్ చేశారు.గతంలో ఇంటి స్థలాల రిజిస్ట్రేషన్ ఖర్చులను కూడా రైతుల నుంచే వసూలు చేయడం ఏమిటని ప్రశ్నించారు. టెక్స్టైల్ పార్క్లోని పరిశ్రమల నుంచి వచ్చిన కార్పొరేట్ సామాజిక బాధ్యత నిధులు ఎంత, వాటిని ఎక్కడ ఖర్చు చేశారో ప్రభుత్వం వెల్లడించాలని కోరారు. భారీ పారిశ్రామిక ప్రాజెక్టు ఏర్పాటవుతున్న గ్రామంలో కనీస తాగునీటి సదుపాయం లేకపోవడం బాధాకరమని,గ్రామానికి అవసరమైన మౌలిక వసతులు కల్పించాలని అన్నారు. భూసేకరణలో జరిగిన అక్రమాలు, అవినీతి,పెండింగ్ పరిహారాలు,ప్లాట్లు, ఇళ్ల కేటాయింపు, అదనపు వసూళ్లు,నిధుల వినియోగంపై జిల్లా కలెక్టర్ ప్రత్యేక విచారణ జరిపించి బాధ్యులపై చట్టపరమైన చర్యలు తీసుకోవాలని కొంగర రవికుమార్ డిమాండ్ చేశారు.

