పేదల జోలికొస్తే ఊరుకునేది లేదు
వైఎస్సార్ నగర్ భూములను మాయం చేసే కుట్ర
బీఆర్ ఎస్ ప్రభుత్వ హయాంలోనే భూ మార్పిడి
2019లో సీలింగ్ భూముల రికార్డుల మార్పు
కాజీపేట చౌరస్తా భవన అనుమతుల్లోనూ అక్రమాలు
ప్రతి అంశానికీ ఆధారాలతో సమాధానం చెబుతా
వరంగల్ పశ్చిమ ఎమ్మెల్యే నాయిని రాజేందర్రెడ్డి
సమాచార హక్కు చట్టం ద్వారా సేకరించిన రికార్డుల వెల్లడి
కాకతీయ, హన్మకొండ : “వైఎస్సార్ నగర్ ప్రజలకు నేను అండగా ఉంటా. పేదలను ఎవరూ ఇబ్బంది పెట్టకూడదు. భూముల వ్యవహారంలో ఎవరు ఏం చేశారో అధికారిక రికార్డులతోనే ప్రజల ముందు ఉంచుతా. రాజకీయ ఆరోపణలకు భయపడేది లేదు.. ప్రతి అంశానికీ ఆధారాలతో సమాధానం చెబుతా” అని వరంగల్ పశ్చిమ ఎమ్మెల్యే నాయిని రాజేందర్రెడ్డి స్పష్టం చేశారు. కాజీపేట వైఎస్సార్ నగర్ భూములు, కాజీపేట చౌరస్తాలో నిర్మించిన భవనానికి సంబంధించిన వస్తున్న విమర్శలు, ఆరోపణలపై మంగళవారం కాజీపేటలో నిర్వహించిన మీడియా సమావేశంలో మాట్లాడారు. సమాచార హక్కు చట్టం ద్వారా సేకరించిన పత్రాలు, రెవెన్యూ రికార్డులు, భూముల వివరాలు, నిర్మాణ అనుమతులకు సంబంధించిన డాక్యుమెంట్లను ప్రదర్శించారు.
మూడు శాఖల రికార్డులతో వాస్తవాల వెల్లడి
వైఎస్సార్ నగర్ గుడిసెవాసుల సమస్యపై గతంలోనే సమాచార హక్కు చట్టం ద్వారా వివరాలు సేకరించానని నాయిని తెలిపారు. మరింత సమగ్ర సమాచారం కోసం మరోసారి దరఖాస్తు చేశానని వెల్లడించారు. రెవెన్యూ, కాకతీయ పట్టణాభివృద్ధి సంస్థ, నగరపాలక సంస్థల నుంచి పత్రాలను సేకరించి పరిశీలించిన తర్వాతే ప్రజల ముందుకు వాస్తవాలు తీసుకొస్తానని చెప్పారు. ఇప్పటివరకు తాను ఏ అంశంపై మాట్లాడినా అధికారిక రికార్డులు, ఆధారాల ఆధారంగానే స్పందించానని, ఊహాగానాలతో ఆరోపణలు చేయడం తనకు అలవాటు లేదని పేర్కొన్నారు. వైఎస్సార్ నగర్ భూములకు సంబంధించి ఇరానీ కుటుంబానికి చెందిన భూములు పట్టణ భూ పరిమితి చట్టం పరిధిలోకి వచ్చాయని ఎమ్మెల్యే వివరించారు. ఈ వ్యవహారంపై అప్పట్లో కుటుంబ సభ్యులు హైకోర్టును ఆశ్రయించారని తెలిపారు. న్యాయస్థానంలో కేసు కొనసాగుతున్న సమయంలోనే 2019లో అప్పటి బీఆర్ఎస్ ప్రభుత్వ హయాంలో, అప్పటి ఎమ్మెల్యే వినయ్ భాస్కర్ ప్రాతినిధ్యం వహిస్తున్న సమయంలో ఆ భూములను వ్యవసాయేతర అవసరాలకు మార్చి ఇరానీ కుటుంబ సభ్యుల పేర్లపై ఎలా నమోదు చేశారని ప్రశ్నించారు. 2018 వరకు రెవెన్యూ రికార్డుల్లో సీలింగ్ భూములుగా నమోదైన భూముల్లో 2019లో ఏ విధంగా మార్పులు జరిగాయన్నది కీలకమని పేర్కొన్నారు. ఇందుకు సంబంధించిన పహాణీలు, ఇతర అధికారిక రికార్డులను మీడియా ముందు ఉంచుతున్నట్లు పేర్కొన్నారు. ఈ భూముల వ్యవహారంలో గుడిసెవాసుల హక్కులపైనా సమగ్ర విచారణ జరగాలని డిమాండ్ చేశారు. భూములపై హక్కులు, రికార్డుల మార్పులు, అప్పటి నిర్ణయాల వెనుక ఉన్న పరిస్థితులన్నీ పరిశీలించినప్పుడే పూర్తి వాస్తవాలు బయటపడతాయని అన్నారు.

