ఘనంగా కార్మికుల ర్యాలీ.. ఎర్రజెండా ఆవిష్కరణ
హమాలీ యూనియన్ ఆధ్వర్యంలో మే డే వేడుకలు
కాకతీయ, తుంగతుర్తి: అంతర్జాతీయ కార్మిక దినోత్సవం సందర్భంగా తుングతుర్తి మండలం వెలుగుపల్లి గ్రామంలో హమాలీ వర్కర్స్ యూనియన్ ఆధ్వర్యంలో మే డే వేడుకలు ఘనంగా నిర్వహించారు. శుక్రవారం ఉదయం కార్మికులు, కర్షకులు కలిసి గ్రామ బస్టాండ్ సెంటర్ నుండి ప్రధాన వీధుల గుండా భారీ ర్యాలీ చేపట్టారు. అనంతరం నిర్వహించిన జెండా ఆవిష్కరణలో కార్మికులు ఉత్సాహంగా పాల్గొని ఒకరికొకరు రంగులు పూసుకుంటూ సంబరాలు జరుపుకున్నారు. ఈ సందర్భంగా పలు కార్మిక సంఘాల నాయకులు మాట్లాడుతూ.. పాలకులు అవలంబిస్తున్న కార్మిక, కర్షక వ్యతిరేక విధానాలను ఎండగట్టారు. కేంద్ర ప్రభుత్వం తీసుకువచ్చిన విద్యుత్ సవరణ బిల్లును తక్షణమే ఉపసంహరించుకోవాలని, ఉపాధి హామీ చట్టాన్ని పటిష్టం చేయాలని డిమాండ్ చేశారు. కార్మిక చట్టాల్లో మార్పులు చేయడం ద్వారా శ్రమజీవుల పొట్ట కొట్టవద్దని హెచ్చరించారు. దశాబ్దాల పోరాటాల ఫలితంగా సాధించుకున్న హక్కులను కాపాడుకోవడానికి కార్మికులందరూ ఐక్యంగా ఉండాలని పిలుపునిచ్చారు. గ్రామంలోని ప్రధాన కూడళ్లలో వివిధ కార్మిక సంఘాలు మే డే వేడుకలను నిర్వహించాయి. పెయింటింగ్ వర్కర్స్ యూనియన్, అంబేద్కర్ సెంటర్లో భవన నిర్మాణ కార్మిక సంఘం ఆధ్వర్యంలో జెండాలను ఆవిష్కరించారు. ఈ కార్యక్రమంలో హమాలీ యూనియన్ నాయకులు, కార్మికులు, కర్షకులు మరియు ప్రజా సంఘాల ప్రతినిధులు పెద్ద సంఖ్యలో పాల్గొన్నారు.
