రణక్షేత్రం!
కరీంనగర్లో రాజకీయం రౌద్రరూపం!
నేడు జిల్లా బంద్కు పిలుపునిచ్చిన బీఆర్ఎస్
జిల్లాకు రానున్న బీఆర్ ఎస్ వర్కింగ్ ప్రెసిడెంట్ కేటీఆర్
ఎమ్మెల్యేల క్యాంపు కార్యాలయాలపై దాడిపై గులాబీ దళం సీరియస్
డీజీపీని కలిసి కేంద్ర మంత్రి బండి సంజయ్పై ఇప్పటికే ఫిర్యాదు
బండి సంజయ్ ఇంటి నుంచే వ్యూహరచన జరిగిందంటూ ఆరోపణలు
యుద్ధానికి సై అంటున్న గులాబీ, కాషాయ శ్రేణులు
జిల్లాలో పతాక స్థాయికి చేరిన రాజకీయ వేడి
వేల సంఖ్యలో పోలీసుల మోహరింపు
ఉత్కంఠతో జిల్లా ప్రజలు, రాజకీయ వర్గాలు
కాకతీయ, కరీంనగర్ : శాంతియుత రాజకీయాలకు నిలయంగా ఉండే కరీంనగర్ ఒక్కసారిగా రణక్షేత్రంగా మారింది. శుక్రవారం నగరంలోని ఎమ్మెల్యేల క్యాంపు కార్యాలయం సాక్షిగా జరిగిన దాడులు జిల్లా రాజకీయ చరిత్రలో సరికొత్త ఉద్రిక్తతకు నాంది పలికాయి. డ్రగ్ టెస్టుల సవాళ్లతో మొదలైన వివాదం, రాళ్లు, కర్రలతో భౌతిక దాడుల వరకు వెళ్లడం తెలంగాణ రాజకీయాల్లో పెను సంచలనం సృష్టించింది. ఈ దాడులను నిరసిస్తూ బీఆర్ఎస్ పార్టీ శనివారం (మే 9) కరీంనగర్ బంద్కు పిలుపునివ్వడంతో జిల్లా మొత్తం హై అలర్ట్లోకి వెళ్ళింది. అటు అదే రోజు బీఆర్ఎస్ వర్కింగ్ ప్రెసిడెంట్ కేటీఆర్ పర్యటన ఖరారు కావడంతో రాజకీయ వేడి సూర్యుడి ప్రతాపాన్ని మించిపోతోంది.
సవాళ్ల పర్వం నుంచి సమరానికి!
గత కొద్ది రోజులుగా బీఆర్ఎస్ ఎమ్మెల్యే పాడి కౌశిక్ రెడ్డి మరియు బీజేపీ నేతల మధ్య మాటల యుద్ధం నడుస్తోంది. తాజాగా డ్రగ్ టెస్టుల విషయంలో కౌశిక్ రెడ్డి విసిరిన సవాలు రాజకీయ రంగు పులుముకుంది. శుక్రవారం కరీంనగర్ జ్యోతినగర్లోని ఎమ్మెల్యే గంగుల కమలాకర్ క్యాంపు కార్యాలయానికి కౌశిక్ రెడ్డి రాగా, అక్కడకు చేరుకున్న బీజేపీ శ్రేణులు ఒక్కసారిగా కార్యాలయంలోకి చొరబడ్డాయి. పోలీసులు అడ్డుకునే ప్రయత్నం చేసినా ఫలితం లేకపోయింది. బీజేపీ కార్యకర్తలు రాళ్లు విసరడంతో కౌశిక్ రెడ్డి కారు అద్దాలు ధ్వంసమయ్యాయి. కార్యాలయం ఫర్నిచర్ చిందరవందర అయింది. శాసనసభ సభ్యులపైనే ఈ స్థాయిలో దాడి జరగడం, అది కూడా నగర నడిబొడ్డున ఉన్న ప్రభుత్వ కార్యాలయంపై దాడి జరగడంతో బీఆర్ఎస్ శ్రేణులు ఉగ్రరూపం దాల్చాయి.
బండి సంజయ్ వైపే వేలెత్తి చూపుతున్న గులాబీ శ్రేణులు
ఈ దాడులు యాదృచ్ఛికంగా జరిగినవి కాదని, పక్కా ప్రణాళిక ప్రకారమే జరిగాయని బీఆర్ఎస్ నేతలు ఆరోపిస్తున్నారు. కేంద్ర మంత్రి బండి సంజయ్ నివాసం నుంచే బీజేపీ కార్పొరేటర్లు, ముఖ్య నేతలు గుంపులుగా బయలుదేరి వచ్చారని, దీనికి సంబంధించిన దృశ్యాలు సీసీ కెమెరాల్లో నిక్షిప్తమై ఉన్నాయని వారు వాదిస్తున్నారు. “శాంతిభద్రతలను కాపాడాల్సిన కేంద్ర మంత్రి, తన కార్యకర్తలను దాడులకు ఉసిగొల్పడం అత్యంత దారుణం” అని మాజీ మంత్రి గంగుల కమలాకర్ ధ్వజమెత్తారు. బీజేపీ నేతలు ఓటమి భయంతోనే భౌతిక దాడులకు దిగుతున్నారని, కరీంనగర్ ప్రజలు వీరికి తగిన బుద్ధి చెబుతారని హెచ్చరించారు.
బంద్తో స్తంభించనున్న నగరం
క్యాంపు కార్యాలయంపై దాడిని అవమానంగా భావిస్తున్న బీఆర్ఎస్ అధిష్ఠానం, శనివారం నాటి బంద్ను ప్రతిష్టాత్మకంగా తీసుకుంది. జిల్లాలోని అన్ని వాణిజ్య సముదాయాలు, విద్యా సంస్థలు, రవాణా వ్యవస్థను స్వచ్ఛందంగా మూసివేయాలని పిలుపునిచ్చింది. జిల్లా వ్యాప్తంగా ఉన్న బీఆర్ఎస్ క్యాడర్ భారీ ఎత్తున కరీంనగర్ చేరుకుంటోంది. దాడులు చేసిన వారిని అరెస్ట్ చేసే వరకు నిద్రపోయేది లేదని, శాంతియుతంగా నిరసన తెలుపుతామని చెబుతున్నా.. క్షేత్రస్థాయిలో పరిస్థితి మాత్రం అత్యంత ఉద్రిక్తంగా ఉంది. బీజేపీ శ్రేణులు కూడా వెనక్కి తగ్గడం లేదు. తమపై తప్పుడు ఆరోపణలు చేస్తే ఊరుకోబోమని వారు హెచ్చరిస్తుండటంతో ఇరువర్గాల మధ్య ఘర్షణలు తలెత్తే అవకాశం కనిపిస్తోంది.
కేటీఆర్ రాకతో పెరుగుతున్న ఉత్కంఠ
బంద్ పిలుపు ఉన్న రోజే కేటీఆర్ కరీంనగర్ పర్యటనకు రావడం రాజకీయంగా అత్యంత ప్రాధాన్యత సంతరించుకుంది. దాడికి గురైన ఎమ్మెల్యేలను పరామర్శించి, కార్యకర్తలను ఉద్దేశించి ఆయన ప్రసంగించనున్నారు. కేటీఆర్ తన ప్రసంగంలో కాంగ్రెస్ ప్రభుత్వం మరియు బీజేపీ తీరుపై ఎలాంటి విమర్శలు చేస్తారనేది ఉత్కంఠ రేపుతోంది. గతంలో కూడా కరీంనగర్ వేదికగా కేటీఆర్ చేసిన వ్యాఖ్యలు రాజకీయ దుమారం రేపాయి. ఇప్పుడు నేరుగా దాడులు జరిగిన నేపథ్యంలో ఆయన పర్యటన జిల్లా రాజకీయాలను ఏ మలుపు తిప్పుతుందోనని విశ్లేషకులు భావిస్తున్నారు.
భద్రతా వలయంలో కరీంనగర్
పరిస్థితి చేయి దాటిపోకుండా పోలీస్ శాఖ భారీ ఏర్పాట్లు చేసింది. కరీంనగర్ నగరంతో పాటు జిల్లా సరిహద్దుల్లో వేల సంఖ్యలో పోలీసులను మోహరించారు. నగరంలో 144 సెక్షన్ విధించారు. ఐదుగురు కంటే ఎక్కువ మంది గుమికూడకుండా ఆంక్షలు విధించారు. చెక్ పోస్టులను ఏర్పాటు చేశారు. బయటి ప్రాంతాల నుంచి వచ్చే అనుమానిత వాహనాలను క్షుణ్ణంగా తనిఖీ చేస్తున్నారు. ఉద్రిక్త ప్రాంతాల్లో ర్యాపిడ్ యాక్షన్ ఫోర్స్ మరియు స్పెషల్ పార్టీ పోలీసులను సిద్ధంగా ఉంచారు. రెచ్చగొట్టే పోస్టులు చేసే వారిపై నిఘా ఉంచి, కాల్ డేటా రికార్డులను పరిశీలిస్తున్నారు. నగర పోలీస్ కమిషనర్ స్వయంగా పరిస్థితులను పర్యవేక్షిస్తున్నారు. దాడులకు పాల్పడిన వారు ఎవరైనా చట్టపరమైన చర్యలు తప్పవని, శాంతిభద్రతలకు విఘాతం కలిగిస్తే కఠినంగా వ్యవహరిస్తామని హెచ్చరించారు.
ప్రజాక్షేత్రంలో తేలాల్సిందే!
ఎమ్మెల్యేల సవాళ్లు, క్యాంపు కార్యాలయాలపై దాడులు, ఇప్పుడు బంద్ పిలుపు.. ఈ వరుస పరిణామాలు కరీంనగర్ ప్రజలను ఆందోళనకు గురిచేస్తున్నాయి. అభివృద్ధి అంశాల కంటే భౌతిక దాడులే ప్రధానం కావడం ప్రజాస్వామ్యానికి చేటు చేస్తుందని విద్యావేత్తలు అభిప్రాయపడుతున్నారు. ఒకవైపు అధికార కాంగ్రెస్ ఈ గొడవను దూరం నుంచి గమనిస్తుండగా, బీఆర్ఎస్ మరియు బీజేపీలు కరీంనగర్ గడ్డపై తమ పట్టు నిరూపించుకోవడానికి ఇదొక అవకాశంగా భావిస్తున్నాయి. నేటి బంద్ మరియు కేటీఆర్ పర్యటనతో కరీంనగర్ రాజకీయం ఎలాంటి మలుపు తీసుకుంటుందో చూడాలి.
