మధిరకు ప్రభుత్వ ఇంజినీరింగ్ కళాశాల మంజూరు

• రాష్ట్ర ప్రభుత్వం ఉత్తర్వులు జారీ.. ఉమ్మడి ఖమ్మం జిల్లా విద్యార్థులకు శుభవార్త

కాకతీయ ఎడ్యుకేషన్ – ఖమ్మం : ఉమ్మడి ఖమ్మం జిల్లా మధిర నియోజకవర్గంలో నూతన ప్రభుత్వ ఇంజినీరింగ్ కళాశాల ఏర్పాటుకు రాష్ట్ర ప్రభుత్వం అధికారికంగా అనుమతి మంజూరు చేసింది. ఈ మేరకు ఉన్నత విద్యాశాఖ జూలై 18న ఉత్తర్వులు జారీ చేసింది. ఈ నిర్ణయం ఉమ్మడి ఖమ్మం జిల్లాలో సాంకేతిక విద్యాభివృద్ధికి కీలక ముందడుగుగా నిలవనుంది. ప్రభుత్వ ఉత్తర్వుల ప్రకారం, అఖిల భారత సాంకేతిక విద్యా మండలి నిర్దేశించిన అన్ని నిబంధనలు, ప్రమాణాలు పూర్తయిన అనంతరం కళాశాల ఏర్పాటు ప్రక్రియ ప్రారంభం కానుంది. కళాశాలలో ప్రారంభించనున్న విద్యా విభాగాలు, అధ్యాపకులు, సిబ్బంది నియామకాలు, భవనాలు, ప్రయోగశాలలు, వసతి గృహాలు తదితర మౌలిక సదుపాయాలపై ప్రత్యేక ఉత్తర్వులు తరువాత జారీ చేయనున్నట్లు ప్రభుత్వం స్పష్టం చేసింది. ఈ కళాశాల ఏర్పాటుకు సంబంధించి తదుపరి చర్యలు చేపట్టాలని సాంకేతిక విద్య కమిషనర్, రాష్ట్ర ఉన్నత విద్యామండలి, జవహర్‌లాల్ నెహ్రూ సాంకేతిక విశ్వవిద్యాలయానికి ప్రభుత్వం ఆదేశాలు జారీ చేసింది.

విద్యార్థులకు కలిగే ప్రయోజనాలు
ఉమ్మడి ఖమ్మం జిల్లాలో ప్రభుత్వ ఇంజినీరింగ్ విద్య అందుబాటులోకి రానుంది.
పేద, మధ్యతరగతి కుటుంబాల విద్యార్థులకు తక్కువ ఖర్చుతో నాణ్యమైన సాంకేతిక విద్య పొందే అవకాశం కలుగుతుంది. మధిర, వైరా, సత్తుపల్లి, ఖమ్మం, భద్రాద్రి కొత్తగూడెం ప్రాంతాల విద్యార్థులకు ప్రయాణ భారం తగ్గనుంది. స్థానిక యువతకు ఉన్నత విద్యతో పాటు ఉపాధి అవకాశాలు కూడా మెరుగుపడే అవకాశం ఉంది. ఉమ్మడి ఖమ్మం జిల్లా విద్యా రంగ అభివృద్ధిలో ఈ నిర్ణయం ఒక కీలక మైలురాయిగా విద్యావేత్తలు, విద్యార్థులు అభిప్రాయపడుతున్నారు. కళాశాల స్థలం, ప్రవేశాల విధానం, ప్రారంభమయ్యే విద్యా విభాగాలపై ప్రభుత్వం త్వరలో మరిన్ని వివరాలు వెల్లడించే అవకాశం ఉంది.