ఏనుమాములలో ఆధునిక ఫ్రూట్ మార్కెట్
ప్రతిపాదిత స్థలాన్ని పరిశీలించిన ఎమ్మెల్యే, కలెక్టర్
భవిష్యత్ అవసరాలకు అనుగుణంగా మౌలిక వసతుల కల్పనకు ప్రణాళిక
కాకతీయ, వరంగల్ ప్రతినిధి : రైతులు, వ్యాపారుల అవసరాలకు అనుగుణంగా ఏనుమాముల వ్యవసాయ మార్కెట్ కమిటీ పరిధిలో ఆధునిక ఫ్రూట్ మార్కెట్ ఏర్పాటుకు అధికారులు కసరత్తు ప్రారంభించారు.
ఆదివారం గీసుకొండ మండలం విశ్వనాథపురం గ్రామ పరిధిలో ప్రతిపాదిత స్థలాన్ని పరకాల ఎమ్మెల్యే రేవూరి ప్రకాశ్ రెడ్డి, జిల్లా కలెక్టర్ డాక్టర్ సత్య శారద, మార్కెట్ కమిటీ చైర్ పర్సన్ పులి ప్రియాంక సంయుక్తంగా పరిశీలించారు. రైతులకు మెరుగైన మార్కెటింగ్ సౌకర్యాలు కల్పించడం, పండ్ల ఉత్పత్తుల విక్రయానికి అనువైన మౌలిక వసతులు ఏర్పాటు చేయడం లక్ష్యంగా ఈ పరిశీలన చేపట్టారు. ప్రతిపాదిత స్థల విస్తీర్ణం, రహదారి అనుసంధానం, రవాణా సౌకర్యం, మౌలిక వసతుల లభ్యత తదితర అంశాలను అధికారులు వివరించారు.
భవిష్యత్ అవసరాలను దృష్టిలో ఉంచుకుని మార్కెట్ అభివృద్ధికి పకడ్బందీ ప్రణాళిక రూపొందించాలని ఈ సందర్భంగా ఎమ్మెల్యే, కలెక్టర్ అధికారులకు సూచించారు. ఈ పరిశీలనలో అదనపు కలెక్టర్ (రెవెన్యూ) ఎల్. కిషోర్ కుమార్, వరంగల్ ఆర్డీవో సుమ, జిల్లా ల్యాండ్ సర్వే అండ్ రికార్డ్స్ అధికారి శ్రీనివాసులు, జిల్లా మార్కెటింగ్ అధికారి నాగరాజు, మార్కెటింగ్ డైరెక్టర్ రుద్రప్రసాద్, మార్కెట్ సిబ్బంది పాల్గొన్నారు.
