భట్టి పర్యటన వేళ.. వినయ్‌ భాస్కర్‌ గృహ నిర్బంధం!
వైఎస్సార్‌ నగర్‌ గుడిసెవాసులకు న్యాయం చేయాలని డిమాండ్‌
మూడు ప్రశ్నలు.. మూడు డిమాండ్లతో ప్రభుత్వాన్ని నిలదీసిన మాజీ ఎమ్మెల్యే
అర్ధరాత్రి అరెస్టు చేసిన నాయకులను విడుదల చేయాలని డిమాండ్‌
ప్రభుత్వ భూముల పరిరక్షణకు పోరాటం కొనసాగిస్తాం : దాస్యం వినయ్‌ భాస్కర్‌
కాకతీయ, హనుమకొండ : ఉప ముఖ్యమంత్రి భట్టి విక్రమార్క పర్యటన నేపథ్యంలో ప్రభుత్వ మాజీ చీఫ్‌విప్‌, మాజీ ఎమ్మెల్యే దాస్యం వినయ్‌ భాస్కర్‌ను పోలీసులు బుధవారం ఉదయం గృహ నిర్బంధం చేశారు. వైఎస్సార్‌ నగర్‌ గుడిసెవాసులకు న్యాయం చేయకపోతే ఉప ముఖ్యమంత్రి పర్యటనను అడ్డుకుంటామని ఆయన ప్రకటించిన నేపథ్యంలో ఈ చర్య చేపట్టారు. ఈ సందర్భంగా వినయ్‌ భాస్కర్‌ మాట్లాడుతూ.. పేదలకు ఇళ్ల పట్టాలు ఇవ్వాలని అడిగితే అరెస్టులు, గృహ నిర్బంధాలు చేయడం ఏమిటని ప్రశ్నించారు. కాజీపేటలో సీలింగ్‌, ప్రభుత్వ భూములంటూ కాంగ్రెస్‌ నాయకులే గతంలో పేదలతో గుడిసెలు వేయించారని వినయ్‌ భాస్కర్‌ పేర్కొన్నారు. గుడిసెవాసులకు పట్టాలు ఇస్తామని హామీ ఇచ్చిన ఎమ్మెల్యే నాయిని రాజేందర్‌రెడ్డి ఇప్పుడు మాట మార్చారని విమర్శించారు. ఈ భూముల వ్యవహారంలో కోట్లాది రూపాయలు చేతులు మారాయన్న ఆరోపణలపై సమాధానం చెప్పాలని డిమాండ్‌ చేశారు. కాజీపేట బ్రిడ్జి నిర్మాణానికి తాము రూ.76 కోట్ల నిధులు తీసుకొచ్చి 80 శాతం పనులు పూర్తి చేశామని, 100 రోజుల్లో పూర్తిచేస్తానన్న నాయిని మూడేళ్లు కావస్తున్నా ఎందుకు పూర్తి చేయలేదని నిలదీశారు. రైల్వే స్టేడియంలో బస్టాండ్‌ నిర్మిస్తామని ఇచ్చిన హామీ ఏమైందని ప్రశ్నించారు.
మూడు డిమాండ్లతో ప్రభుత్వానికి హెచ్చరిక
వైఎస్సార్‌ నగర్‌ గుడిసెవాసుల తరఫున పోరాడుతున్న బీఆర్ఎస్ నాయకులపై కేసులు తొలగించాలని, గుడిసెవాసులపై దాడి చేసిన వారిపై కేసులు నమోదు చేయాలని వినయ్‌ భాస్కర్‌ డిమాండ్‌ చేశారు. బాధితులకు పట్టాలు ఇవ్వాలని లేదా ఆ భూమి పేదలకు దక్కేలా చర్యలు తీసుకోవాలని కోరారు. అర్ధరాత్రి అరెస్టు చేసిన బీఆర్ఎస్ నాయకులు, మహిళలు, కాలనీవాసులను వెంటనే బేషరతుగా విడుదల చేయాలని డిమాండ్‌ చేశారు. చెరబండరాజు కాలనీలో దళితులు, వైఎస్సార్‌ నగర్‌ గుడిసెవాసులపై దాడులు, న్యూ శాయంపేట అభయాంజనేయ స్వామి ఆలయ భూమి, ఎన్‌ఐటీ సమీప భూమి, బాలసముద్రంలోని కుడా భూమి, మైనార్టీలకు కేటాయించిన భూముల వ్యవహారాలను ప్రస్తావిస్తూ ప్రభుత్వ భూములపై కాంగ్రెస్‌ నాయకులు కన్నేశారని ఆరోపించారు. కాజీపేట కోచ్‌ ఫ్యాక్టరీ, రైల్వే డివిజన్‌ సాధన కోసం తాము పోరాడినప్పుడు నాయిని ఎక్కడున్నారని విమర్శించారు. పేదలకు ఇళ్ల పట్టాలు, పక్కా ఇళ్లు కల్పించే వరకు బీఆర్ఎస్ అండగా నిలిచి పోరాటాన్ని కొనసాగిస్తుందని స్పష్టం చేశారు. అరెస్టయిన వారిలో మాజీ కార్పొరేటర్‌ సంకు నర్సింగరావు, తండమళ్ల వేణు, సుంచు కృష్ణ, కాటాపురం రాజు, దువ్వ కనకరాజు, బేధరకోట రంజిత్‌కుమార్‌, బరిగెల వినయ్‌, పాలడుగుల శివకుమార్‌, నయీమ్‌ జుబేర్‌, మహమ్మద్‌ హుస్సేన్‌, సిద్ధు, కొండ్ర శంకర్‌తో పాటు వైఎస్సార్‌ నగర్‌ వాసులు హరినాథ్‌, మంజుల, సతీష్‌ ఉన్నారు. తొలుత కాజీపేట పోలీస్‌స్టేషన్‌లో ఉంచిన వారిని బుధవారం ఉదయం హసన్‌పర్తి పోలీస్‌స్టేషన్‌కు తరలించారు.
